दुईसय वर्षको कार्यक्रम भाँड्न गोरखाहरुको प्रदर्शन

 

लण्डन । आफूहरुलाई अझै पनि समान अधिकार नदिइएको गुनासो गर्दै आएका भूपू गोरखाहरुले प्रतिक्रियास्वरुप विहीबार विरोध प्रदर्शन गरेका छन् ।

गोरखा भर्तीको दुईसय वर्ष पुगेको अवसरमा बेलायती प्रधानमन्त्रीको कार्यालय १० डाउनिङ स्ट्रिटमा आयोजित विशेष परेड समारोह भाँड्न उनीहरुले प्रदर्शन गरेका हुन् ।

प्रदर्शनमा बेलायतका विभिन्न भागबाट आएका करिब ५०० गोरखाहरु सहभागी थिए ।

ब्रिगेड अफ गोर्खाज्ले आयोजना गरेको विशेष परेड हुने बेला पारेर नै गोरखाहरुले प्रदर्शन आयोजना गरेको संयुक्त गोरखा सत्याग्रह संघर्ष समितिका संयोजक कृष्णबहादुर राईले बताए । राईले नेपालमा भुकम्पले देश र जनता रोइरहेका बेला ब्रिगेड अफ गोर्खाज् प्रमुखलाई विशेष परेड कार्यक्रम रोक्न आग्रह गर्दा पनि नमानेपछि विरोध प्रदर्शन गरेर अवरोध गर्न बाध्य हुनु परेको जानकारी दिए ।

भूपू गोरखाहरुको कार्यक्रम ३ बजे सकिने जानकारी पाएर सरकारी पक्षले पूर्व निर्धारित कार्यक्रम संशोधन गरी ३ बजे परेड सारे पनि गोरखाहरुले फेरि कार्यक्रम लम्ब्याएर विरोध प्रदर्शन गरेका थिए ।

आक्रोशित भूपू गोरखाहरुले २०० वर्षका अवसरमा आयोजना गरिने सबै कार्यक्रम अवरोध गर्ने चेतावनी दिएका छन् ।

तर आज गरिएको विरोध प्रदर्शन भने सान्दर्भिक नभएको कतिपयको धारणाा छ ।

बेलायतले नेपालमा गएको भुकम्पका लागि त्यत्रो सहयोग गरिरहेको बेलामा विरोध प्रदर्शन गरिनु त्यति सान्दर्भिक नभएको आलोचकहरुको भनाइ छ ।