एनआरएनए यूकेले धादिङ र नुवाकोटमा टोली पठाउने

 

लन्डन । एनआरएनए यूकेले भुकम्प पीडित परिवारको आकस्मिक उद्दार र सहयोगका लागि एउटा टोली धादिङ र नुवाकोटमा पठाउने भएको छ । एनआरएनए यूकेको बुधवार बसेको आकस्मिक सचिवालय बैठकले उक्त निर्णय गरेको हो ।

संघले महासचिव आर के त्रिपाठीको संयोजकत्वमा एनआरएनए आइसीसीसंग संयोजन गर्दै तत्काल ति जिल्लामा आफ्ना पदाधिकारी पठाउने जनाएको छ । उद्दार र राहतका लागि जाने टोलीमा एनआरएनए यूके आइसीसी सदस्य सुष्मा राई, एनआरएनए यूके उपाध्यक्षहरु बालकृष्ण गुरुङ र शान्ति थापा, सदस्य फडिन्द्र भट्टराई, सल्लाहकार सुरज केसी, कल्पना आङबुहाङ र १००० ग्रयाजुएट्सका युवा स्वयंसेवीहरु अशोकनाथ योगी, सुजाता श्रेष्ठ, अन्जु मल्ल लगायत छन् ।

यसैबीच, गैर आवासीय नेपाली संघले अत्यधिक प्रभावित सिन्धुपाल्चोकमा लगेको राहत सामाग्री बीचमै लुटिएको छ । संघका ग्लोवल च्यारिटी टास्कका सहसंयोजक कुल आचार्यले पीडितसम्म पुग्नु पर्ने सामाग्री बीचमै गुण्डागर्दी शैलीमा लुटिएको जनाए । उनले भूकम्प पीडितका लागि तत्काल राहत आवश्यक भएकाले समस्त बेलायतवासी नेपालीमा सहयोग गर्न अपिल गरेका छन् । ‘पीडितहरुलाई समयमै राहत दिनुपर्ने बेला भएकाले हामी साना तिना कुरामा अल्झनु भन्दा एक्सनमै जान जरुरी छ’, आचार्यले भने ।