बेलायतबाट दश जनाको अग्नी नियन्त्रक टोली पनि नेपाल प्रस्थान

लन्डन । विनाशकारी भूकम्पले आक्रान्त नेपालमा पीडितहरुको उद्दार र राहतका लागि अन्तर्राष्ट्रिय समुदायको उपस्थिति आकासिएको छ । विशेषगरि, बेलायतले मानवीय सहायता तीव्र पारेको छ । बेलायतले आइतबारमात्रै करिब ८० करोड रुपैयां सहयोग गर्ने घोषणा गरेको छ भने सोमबार सांझ क्वीन्स गोरखा इन्जिनियर्सबाट ३१ जनाको टोली उद्दारका लागि नेपाल पठाएको छ । कर्पोरल लाल रानाका अनुसार, गोर्खा फिल्ड स्क्वाडनका कमिसन अफिसर मेजर हेनरीको नेतृत्वमा सो टोली नेपाल गएको हो ।

यस अतिरिक्त रसमोर फायर स्टेशन वाच म्यानेजर साइमन फोर्सटरसहित 
ह्याम्पसायरस्थित दश अग्नी नियन्त्रक सम्मिलित टोली उद्दारका लागि आइतबार नेपाल प्रस्थान गरेको गेट ह्याम्पसायर न्यूजले जनाएको छ । डिपार्टमेन्ट फर इन्टरनेशनल डेभलप्मेन्ट (डिएफआइडी) टाक्स फोर्सको अंगका रुपमा उद्दारका लागि टोली प्रस्थान गरेको हो । तालिमप्राप्त चारवटा कुकुर, औषधि, ११ टन सामाग्री (टर्च, करौंती, डोरी, क्यामेरा, स्ट्रेचर, टेन्ट आदि) र विदेश मन्त्रालयका अधिकारीहरु समेत नेपाल गएका बताइएको छ । ह्याम्पसायर फायर एण्ड रेस्क्यू सर्भिस्का डेपुटी चिफ अफिसर निल ओडिनले नेपालमा सहायता दिन पाउंदा गर्व लागेको भन्दै ट्वीट गरेका छन् । उता, लिसा मे फाउण्डेशन नामक च्यारिटीले दशजना चिकित्सक नेपाल पठाउने भएको छ ।

नेपालीको अत्यधिक बसोवास रहेको रसमोर बरोमा राहत सामाग्री र आर्थिक सहयोग संकलन अभियान शुरु भएको छ । करिब १० हजार नेपाली वसोवास गर्ने ठानिएको उक्त बरोका सर्रे र ह्याम्पसायरमा आर्थिक सहयोग संकलन जारी छ । रसमोर बरो काउन्सिलका प्रमुख कार्यकारी एन्ड्रियु लोयडले कोष अभिवृद्धि अभियानका लागि काउन्सिलले राहत सामाग्री छिटो र प्रभावकारी ढंगले पठाउन आफ्ना साझेदार संस्थाहरुसंग समन्वय गरिरहेको जनाए । उनले गोर्खा वेलफेयर ट्रष्ट, नया युवा समूह र रोटरी जस्ता निकायसंग नजिकबाट काम गरिरहेको पनि उल्लेख गरे । लोयडले नेपालको विपत्तिले आफू दुःखी भएको जनाउंदै रसमोरवासी नेपाली आफ्नो परिवार र आफन्तजनले भोगेको पीडाले आक्रान्त भएका बताए ।

यसैबीच, नर्थक्याम्प मेथोडिष्ट चर्चमा मृतात्माको सम्झनामा मैनवत्ती प्रज्वलन गरि श्रद्धाञ्जलि अर्पण गरिएको छ ।