मंगलबार, असोज ६ २०७७ | Tue, September 22, 2020
नेपालको समय: १३:५२ | UK Time: 09:07

बेलायतले भुकम्प पीडित नेपाललाई गर्ने सहयोगबारे छलफल

वीनेपाली
२०७२ वैशाख १२ गते २१:०४

2000px-Union_flag_1606_(Kings_Colors).svg

लण्डन । बेलायतले भुकम्पबाट नराम्रोसित प्रभावित नेपाललाई गर्न सक्ने सहयोगका बारेमा छलफल भएको छ ।

शनिबार साँझ बेलायतकाे विदेश मन्त्रालयका दक्षिणा एसिया डेस्क हेर्ने प्रतिनिधिले बेलायतस्थित नेपालका कार्यबाहक राजदुत तेजबहादुर क्षेत्रीलाई टेलिफोन गरी बेलायतले नेपाललाई सहयोग गर्ने प्रतिवद्धता दोहोर्याएका थिए ।

क्षेत्रीका अनुसार वार्तामा बेलायतले नेपाललाई गर्ने सहयोगका बारेमा छलफल भएको थियो ।

यसअघि बेलायती प्रधानमन्त्री डेभिड क्यामरुनले शनिबार नै नेपाललाई भुकम्प पीडितलाई उद्धार र राहत कार्यमा सहयोग गर्ने वचन दिएका थिए ।

भारत र चीनले उद्धारकर्तासहित सहयोग गर्न लागेको अवस्थामा बेलायतले कसरी सहयोग गर्ने भन्ने बारेमा प्रष्ट भइसकेको छैन ।

यसैबीच बीबीसीका अनुसार बेलायतले आठ सदस्सीय विशेषज्ञ टोली नेपाल पठाउने भएको छ ।

उता शनिबार नै कार्यबाहक प्रधानमन्त्रीको कार्यभार सम्हालिरहेका उपप्रधानमन्त्री वामदेव गौतमको अध्यक्षतामा बसेको मन्त्रिपरिषद्को बैठकले अन्तर्राष्ट्रिय जगतलाई सहयोग गर्न अाह्वान गरेका थिए ।

बेलायती विदेश  मन्त्रालयका प्रतिनिधिले शनिबार गएको भुकम्पमा नेपालले ठूलो क्षति ब्यहोर्नुपरेकोमा बेलायत सरकारका तर्फबाट दुःख व्यक्त गरेका थिए ।

उनले काठमाडौँस्थित बेलायती दूताबासबाट पनि उद्धारमा सहयोग हुँदै आएको जानकारी गराएका थिए ।

यसैबीच नेपाली दूताबासले बेलायतबाट भुकम्प पीडितलाई प्रभावकारी रुपमा राहत संकलन गर्न र वास्तविक पीडितहरुमा राहत पुर्याउने बारेमा छलफल गर्न ४ बजे आइतबार सबै नेपाली संघसंस्थालाई उपस्थितिका लागि आग्रह गर्दै बैठक डाकेको छ ।

 

प्रतिक्रिया

सम्बन्धित सामाग्री

फेसबुक