लण्डन । युकेबाट यसवर्ष प्रकाशित नेपाली कृतिहरुमध्ये गोविन्द बेल्वासेको ‘रातो पासपोर्ट’ कथा  संग्रह उत्कृष्ट कृति ठहरिएको छ ।

नेपाली साहित्य विकास परिषद् युकेले स्थापना गरेको नेपाली साहित्य पुरस्कारका लागि गतवर्ष युकेका स्रष्टाहरुबाट प्रकाशित कृतिहरुमध्येबाट सो कृति ठहरिएको परिषद्ले जनाएको छ ।

त्यसैगरि सागर सिल्वालको ‘सागरको मोति’ गजल संग्रह दोस्रो र हरिसिंह थापाको ‘उत्तराखण्ड चारधाम’ यात्रा अनुभूति तेस्रो भएको छ ।

कृति मूल्यांकनका लागि दुर्गाप्रसाद पोखरेलको संयोजकत्वमा खगेन्द्र नेपाली, वाचस्पति रेग्मी, केशव पुडासैनी र डा मीन रानाभाट सदस्य रहेको छनोट समिति बनाइएको थियो ।

समितिले आफूहरुलाई लेखकहरुबाट प्राप्त भए कृतिहरुमध्येबाट भाषा शैली, विषयवस्तु र भाषा सन्तुलन, कथानक, विम्ब, रस अलङ्कार आदिको समुचित प्रयोग, भाषिक शुद्धता, प्रस्तुतिमा मौलिकता, आवरणकला, सन्देशमूलकता, जानकारी तथा चेतना, समावेशी उत्प्रेरणाका कुराहरु, राष्ट्रप्रेम, मानवीयता, हार्दिकता, भ्रातृत्व, प्रकृति प्रेम, डायस्पोरा वा प्रवासी चेतना, सामाजिक विसङ्गतिमाथि व्यङ्ग्य र सुधारको आशा, पाठकमा पार्ने प्रभाव-सकारात्मक सोच, नेपाली भाषा साहित्य एवं संस्कृतिप्रति उत्प्रेरणा जगाउन सक्षम लगायतलाई मापदण्ड बनाएको थियो ।

सो पुरस्कार बेलायतमा रहेका साहित्यसेवी कोमलप्रसाद श्रेष्ठ मल्ल तथा श्रीमती कोहिनूर मल्लले नेपाली साहित्य विकास परिषद् बेलायतका लागि स्थापना गरेका हुन् ।