डा. कपिल रिजाल
लन्डन । बेलायतमा कार्यरत नेपाली चिकित्सकहरुमाथि बेलाबेला एउटा आक्षेप लाग्ने गर्छ–उनीहरु नेपाली समुदायमा घुलमिल भएनन्, मर्दा पर्दा सरसहयोग गरेनन् । तर, सबैलाई यो आरोप लगाए अन्याय हुनेछ किनकि त्यो कुरा गलत सावित गरिदिएका छन् डा. कपिल रिजालले ।
उनको आफ्नै परिचय काफी छ बेलायतको नेपाली समुदायमा तर जानकारीका लागि उनी हुन् नेपालका वरिष्ठ प्रसुति रोग विशेषज्ञ डा. भोला रिजालका सुपुत्र ।
सन् १९९३ मा बेलायत प्रवेश गरेका रिजाल दन्त चिकित्सक हुन् र हाल बेलायतमा उनका चारवटा ‘डेन्टल प्राक्टिस’ चालु छन् । उनले १५ जना डाक्टर र २० जना जति नर्सलाई जागिर दिएका छन् ।
यिनै समाजसेवी डाक्टरको पहलमा नेपालको धनकुटास्थित चुलाचुलीमा हेल्थ क्याम्प हुने तयारी अन्तिम चरणमा छ । नेपाल मेडिकल कलेज र ऊं नर्सिङ होमका अनुभवी चिकित्सक र नर्स सम्मिलित करिब ४० जनाको टोलीले आगामी २९ र ३० मार्चका दिन शिविर सञ्चालन गर्ने तयारी गरेको हो । शिविरमा नोवेल मेडिकल कलेज बिराटनगर र धरानबाट समेत स्वयंसेवी चिकित्सकहरुको सहभागिता रहने अपेक्षा छ । यसपटक करिब दशहजार विरामीको निशुल्क जांच र आवश्यक पर्नेलाई निशुल्क औषधि वितरण गर्ने योजना छ ।
गाइनो, सर्जरी, डेन्टल, आंखा, नाक, कान, घांटी, जोर्नी लगायत जांच र निशुल्क औषधि वितरण गरिने रिजालले जनाए । ‘गम्भीर विरामीलाई विराटनगर, धरानका अस्पताल र काठमाण्डौं ऊं नर्सिङ होमसम्म ल्याएर निशुल्क उपचार गर्ने हाम्रो सोच छ’–रिजाल भन्छन् ।
डा. भोला रिजालले आफ्नी आमाको नाममा स्थापना गरेको ललितादेवी ट्रष्ट, नेपाल मेडिकल कलेज र ऊं नर्सिङ होमको नाममा शिविर हुन लागेको हो । दुई वर्ष अघि उनकै पहलमा मुगुमा स्वास्थ्य शिविर सम्पन्न भएको थियो जसबाट करिब ७ हजार विरामी लाभान्वित भएका थिए ।
डा. रिजालले नेपालमा हुने हेल्थ क्याम्पको सहयोगार्थ यहां ‘फण्ड रेज’ अभियान समेत थालेका छन् । बेलायतस्थित एउटा च्यारिटी संस्था लिसा मे फाउण्डेशनमार्फत सहयोग संकलन जारी छ । ५ हजार पाउण्ड संकलन गर्ने उद्देश्यका साथ थालिएको अभियानमा यो समाचार लेख्दासम्म ३ हजार दुईसय पाउण्ड बढि संकलन भइसकेको छ । उनले संकलित रकममध्ये आधा (२५ सय पाउण्ड) नेपालको स्वास्थ्य शिविर र आधा फ्रिम्ली पार्क हस्पिटलमा उपचाररत प्रोस्टेट क्यान्सर विरामीलाई दिने योजना बनाएका छन् ।
डा. कपिलले अब हरेक १८ महिनामा नेपालमा यस्तै स्वास्थ्य शिविर विभिन्न जिल्लामा सञ्चालन गर्ने सोच रहेको समेत बताए । यसपटक उनलाई श्रीमति रजनी, १६ वर्षीया जेठी छोरी संगीता र ९ वर्षीय कान्छी छोरी ताराले पनि सघाउनेछन् ।
