लन्डन । बेलायत सरकारले गोर्खा भेट्रान र तिनका परिवारका लागि नयां घर बनाइदिने भएको छ । यस प्रयोजनका लागि सरकारले गोर्खा होम्स् लिमिटेडलाई ९ लाख ६० हजार पाउण्ड दिएको हो । ४० मिलियन पाउण्ड राशीको भेट्रान्स् एकोमोडेसन फण्डबाटै उक्त रकम निकासा भएको छ । तर, नयां घर कहां निर्माण गरिने तय भइसकेको छैन् । भूपू गोर्खाहरु बसोवास गरिरहेको बेजिङस्टोक, अल्डरसट, फार्नवोरो, रेडिङ, सेल्स्वरी र स्वीन्डन शहर आवास निर्माणका सम्भावित क्षेत्र भित्र छन् ।

भूपू गोर्खाहरुका ऐतिहासिक गुनासाबारे छानवीन गर्न गठित सर्वदलीय संसदीय समितिकी अध्यक्ष ज्याकी डोयल प्राइसको सिफारिसपछि नयां घर बनाउन लागिएको जनाइएको छ । रक्षा कर्मचारी, वेलफेयर र भेट्रान्स्् हेर्ने मन्त्री अन्ना सोब्रीले गोर्खाहरुले बेलायती जनताको मुटुमा विशेष स्थान बनाएको जनाउंदै ज्याकी डोयल प्राइसको छानवीन प्रतिवेदनको प्रशंसा गरिन् । ‘हामीले यसै वर्ष ब्रिटिश सेनामा गोर्खा भर्तीको दुई सय वर्ष मनाउंदैछौं’, सोब्रीले भनिन्, ‘समितिको सकारात्मक सिफारिस कार्यान्वयन प्रक्रियाले गोर्खा र बेलायत नेपालबीचको दौत्य सम्वन्ध अरु मजवुत बनाउने छ ।’