लन्डन । अन्तर्राष्ट्रिय कानुनका प्राध्यापक डा. सूर्य सुवेदीले अर्को नयां अन्तर्राष्ट्रिय नियुक्ति पाएका छन् । संयुक्त राष्ट्रसंघको क्याम्बोडियाका लागि मानव अधिकार सम्वन्धि विशेष दूतको रुपमा उनको ६ वर्ष लामो कार्यकाल सकिनै लागेका बेला प्रा. सुवेदीलाई स्वीट्जरल्याण्डको डाभोसस्थित विश्व आर्थिक मञ्च र जेनेभास्थित अन्तर्राष्ट्रिय व्यापार र दिगो आर्थिक विकास केन्द्रले वैदेशिक लगानी सम्वन्धि अन्तर्राष्ट्रिय नीति निर्माण गर्न गठन गरेको एक उच्चस्तरिय कार्यसमितिमा नियुक्ति गरेको हो ।
डाभोसस्थित उक्त संस्था संसारका राजनीतिक नेताहरु, ठूला औद्योगिक लगानीकर्ता र उद्यमीहरुको विश्वको आर्थिक स्थितिबारे छलफल र नीति निर्माण गर्ने प्रतिष्ठित संस्था हो । संसारका विभिन्न प्रतिष्ठित संस्थाबाट विशेष दक्षताका आधारमा नियुक्ति गरिएका विशेषज्ञहरुको उक्त कार्यसमितिमा प्रा. सुवेदीलाई उनको अन्तर्राष्ट्रिय वैदेशिक लगानी सम्वन्धि कानुनमा भएको दक्षताको आधारमा नियुक्ति गरिएको हो । उनको यस विषय सम्वन्धि सन् २००८ मा अक्फोर्डबाट प्रकाशित ग्रन्थ संसारका धेरै विश्वविद्यालयमा पठनपाठनमा उपयोग हुंदै आएको छ । उनी बेलायतको लिड्स विश्व
विद्यालयमा अन्तर्राष्ट्रिय कानुनका प्राध्यापक र लन्डनमा व्यारिष्टर छन् ।
