आन्दोलन प्रभावकारी बनाउन तीस दलीय मोर्चाले वक्ता तोक्यो

काठमाडौं। सत्तारुढ दल र संविधानसभा सभाध्यक्षका एकीकृत नेकपा (माओवादी) नेतृत्वको ३० दलीय मोर्चाले देशव्यापी जनपरिचालनको कार्यक्रम घोषणा गर्दै केन्द्रीय वक्तासमेत तोकेको छ । एमाओवादी संसदीय दलको कार्यालयमा बिहीबार बसेको बैठकले फागुन २ गते मुलुकका प्रमुख ३५ स्थानमा बृहत् कार्यकर्ता भेला गर्ने र त्यसलाई मोर्चाका शीर्ष नेताले सम्बोधन गर्ने कार्यक्रम तय गरेको छ ।
मोर्चाका प्रवक्ता प्रेमबहादुर सिंहका अनुसार एमाओवादी अध्यक्ष पुष्पकमल दाहालले काठमाडौंमा आयोजना गरिने प्रशिक्षण कार्यक्रमलाई सम्बोधन गर्ने कार्यक्रम छ भने वरिष्ठ नेता बाबुराम भट्टराईले नेपालगन्ज र उपाध्यक्ष नारायणकाजी श्रेष्ठले झापामा सम्बोधन गर्ने कार्यक्रम तय गरिएको छ ।

यस्तै मधेसी जनअधिकार फोरम नेपालका अध्यक्ष उपेन्द्र यादव विराटनगर, मधेसी जनअधिकार फोरम नेपाल (लोकतान्त्रिक) का अध्यक्ष विजयकुमार गच्छदार राजविराज र तराई मधेस लोकतान्त्रिक पार्टीका अध्यक्ष महन्थ ठाकुरले भैरहवाको कार्यकर्ता भेलालाई सम्बोधन गर्ने कार्यक्रम छ ।
मोर्चाले खोटाङमा संघीय समाजवादी पार्टीका अध्यक्ष अशोक राई, जनकपुरमा सद्भावना पार्टीका अध्यक्ष राजेन्द्र महतो, बारामा सोही दलका सहअध्यक्ष लक्ष्मणलाल कर्ण, कास्कीमा एमाओवादी सचिव वर्षमान पुन र चितवनमा एमाओवादी स्थायी समिति सदस्य अग्नि सापकोटालाई केन्द्रीय वक्ता तोकेको छ ।
मोर्चाले फागुन ९ गते देशव्यापी जनपरिचालन गर्ने जनाएको छ भने माघ २९ देखि मुलुकभर कालो झन्डा प्रदर्शन गर्ने कार्यक्रम अगाडि सारेको छ । सहमतिका आधारमा संविधान जारी गर्न नेपाली कांग्रेस र नेकपा (एमाले) लगायत दल तयार नभएको भन्दै मोर्चा आन्दोलनमा उत्रिएको हो ।

जनपरिचालनलगायत कार्यक्रमका लागि मोर्चामा आबद्ध दलका सभासदबाट २० हजारका दरले रकम उठाउने निर्णयसमेत बैठकले गरेको प्रवक्ता सिंहले जानकारी दिए । शान्तिपूर्ण आन्दोलन गर्ने र सहमतिका आधारमा संविधान जारी गर्ने वातावरण बनाउन केन्द्रित हुनेसमेत बैठकले निर्णय गरेको छ ।