लण्डन । कहिले सुल्झिँदै कहिले बल्झिँदै आएको गैरआवासीय नेपाली संघ (एनआरएनए) युकेको विवाद अब समाधानतर्फ गएको छ ।
एनआरएनए युकेमा देखिएको विवादका बारेमा अध्ययन गर्न एनआरएन आइसिसीले गठन गरेको छानविन समितिले दिएको प्रतिवेदन अनुसार आइसिसीले दिएको निर्देशन पालना गर्दै महेन्द्र कँडेल पक्षले आज कागजात र पैसा बुझाएपछि अब विवाद किनारा लाग्ने संकेत देखिएको हो ।
आइसिसीको निर्देशनबमोजिम आज कँडेलले ३ हजार सदस्यहरुको सदस्यता फारामसहितका कागजात र उम्मेदवारी शुल्कको बाँकी रकम एनआरएन युकेको संरक्षक परिषदसमक्ष बुझाएका छन् ।
बिहीबार साँझ वीनेपालीसित कुरा गर्दै कँडेलले भने – ‘आइसिसीले भनेअनुसारको कागजात र उम्मेदवारी शुल्क आज संरक्षक काउन्सिललाई बुझाएको छु ।’ उनले अब चाँडै आइसिसीले विशेष साधारणसभा बोलाएर नेतृत्व आफूलाई हस्तान्तरण हुनेमा विश्वास पनि व्यक्त गरे ।
केन्द्रले कँडेललाई सदस्यता फाराम र उम्मेदवारी शुल्क दाखिल गर्न दुई साताको समय दिएको थियो । त्यसपछि विशेष साधारणसभा गरी कँडेललाई नेतृत्व हस्तान्तरण गर्ने आइसिसीले निर्णय गरेको छ ।
एनआरएनए युके संरक्षक काउन्सिलका प्रमुख संरक्षक प्रा.डा. सूर्य सुवेदी युकेबाहिर भएका कारण सुवेदीकै आग्रहमा कागजात र शुल्क एनआरएनए युकेका पूर्व अध्यक्ष सूर्य गुरुङले बुझेका थिए ।
कागजात बुझेपछि वीनेपालीसित प्रतिक्रिया दिँदै गुरुङले भने- ‘संरक्षक काउन्सिलले महेन्द्र कँडेलले बुझाउनुभएको ३ हजार सदस्यको सदस्यता फाराम, फोटो, परिचयपत्र, प्रुफ अफ अड्रेस सबै रुजु गरी बुझिलियौँ ।’
काउन्सिललाई सबै सदस्यता फाराम र कागजात रुजु गर्न करिब चार घण्टा लागेको थियो । काउन्सिलका अनुसार बुझाइएका सबै फारामहरु स्वीकृत भएका छन् ।
यसैगरी उम्मेदवारी शुल्कवापत बुझाउन बाँकी ३ हजार ४४० पाउण्डको प्रा.डा. सुवेदीको नामको चेक पनि कँडेलले बुझाएका छन् । यसअघि उम्मेदवारी शुल्क बढी भएको भन्दै कँडेल पक्षले आंशिक शुल्क मात्र बुझाएका थिए । अहिले शुल्क थपेर उनले योगेन्द्र क्षेत्री समूहले बुझाए बराबर बनाएका छन् ।
आइसिसीको पत्र मुताबिकको कागजात दाखिला भएपछि गुरुङले भने, ‘आजको रिपोर्ट म भ्याए आजै वा भोलि आइसिसीलाई बुझाइदिन्छु । त्यसपछि आइसिसीका पदाधिकारीहरुको बैठकले कहाँ, कहिले र कसले विशेष साधारणसभा बोलाउने भन्ने तोक्ने छ ।’
आइसिसीले तोकेको समयभन्दा अगावै कँडेल पक्षले जिम्मेवारी पूरा गरेकोमा खुशी व्यक्त गर्दै गुरुङले एनआरएनए युकेको छवि राम्रो बनाउन सबैले सहयोग गर्नपर्ने बताए ।
फार्नब्रोस्थित गोरखा प्यालेस रेष्टुरेन्टमा भएको कागजात हस्तान्तरण कार्यक्रममा एनआरएन युकेका संरक्षक काउन्सिल सदस्य मेजर रिटायर्ड डमर घले, आइसिसी सदस्यहरु सुषमा राई, विनोद ज्ञवाली र थर्क सेन, उपाध्यक्ष शान्ति थापा कुँवर र पूर्व प्रवक्ता जीव बेल्बासे उपस्थित थिए ।
एनअारएनए युकेको योगेन क्षेत्री समूहले यसअघि नै पत्रकार सम्मेलन गरी अाइसिसीले गठन गरेको छानविन समितिको प्रतिवेदन स्वीकार्ने बताइसकेकाे छ ।
तस्वीर सूर्य गुरुङबाट
