दशैंमा ४५ अर्बको नयाँ नोट बजारमा

नेपाल राष्ट्र बैकले दशैंको समयमा ४५ अर्ब रुपैयाको नयाँ नोट बजारमा पठाउने भएको छ । बैंकले बुधबारबाट नयाँ नोट वितरण गर्ने भएको छ । राष्ट्र बैंकको मुद्रा व्यवस्थापन विभाग, थापाथली र बैंकको सातवटा जिल्ला कार्यालयबाट फुलपातीको दिन वितरण गरिने छ ।

राष्ट्र बैंकले तोकेको विभाग तथा कार्यालयमा गएर सर्वसाधारण तथा संस्थाले पुराना नोटसँग नयाँ नोट साट्न सक्नेछन् । यो वर्ष ५, १०, २०, ५० र १ सय रुपैयाको नयाँ नोट वितरण गर्न लागेको हो ।
बैंकका प्रवक्ता मनमोहनकुमार श्रेष्ठले प्रतिव्यक्ति रु ५, १० र २० का दुई दुई प्याकेट र रु ५० र १०० दरका एक एक प्याकेट गरी रु २२ हजारसम्म नयाँ नोट उपलब्ध गराइने राससलाई बताएका छन् ।
विभिन्न बैंक तथा वित्तीय संस्था एवम् सरकारी कार्यालयका लागि भने केही दिनपछिबाट मात्र ती संस्थाको मागअनुसार राष्ट्र बैंकले पटकपटक गरेर नयाँ तथा सफा नोट वितरण गर्ने तयारी गरेको छ ।
यस वर्ष रु २० देखि २५ अर्ब बराबरको नयाँ नोट र सोही बराबरका सुकिला नोट गरी रु ४५ अर्ब बजारमा पठाउन लागेको राष्ट्र बैंकले जनाएको छ । सबै जिल्लामा पुर्याउनका लागि ठूलो परिमाणमा नयाँ नोट वितरण गर्नुपर्ने अवस्था आएको प्रवक्ता श्रेष्ठको भनाइ छ ।

चाडपर्वको अवसरमा नयाँ नोट बढी फोहर हुने भएकाले सकेसम्म अबिर तथा अन्य रङको प्रयोग नगरिदिन सर्वसाधारण सबैमा राष्ट्र बैंकले अनुरोध गरेको छ । सबैभन्दा बढि प्रयोगमा आउने रु पाँच, १०, २० का नोटको आयु एक वर्षमात्र हुने भएकाले सुरक्षित प्रयोग गर्नुपर्ने हुन्छ । त्यसैगरी रु ५०, १००, ५०० र एक हजारको दुई वर्षसम्म प्रयोग गर्न सकिने भएकाले कम फोहर हुने गरेको छ ।

प्रवक्ता श्रेष्ठले नयाँ नोट छाप्न र पुराना नोट धुनका लागि राष्ट्र बैंकले ठूलो रकम खर्च गर्नुपर्ने भएकाले त्यसतर्फ ध्यान दिनका लागि सर्वसाधारणमा अनुरोध गरे ।