बेल्जियमका नेपालीको प्रशंसा

 

बेल्जियम । बेल्जियमको ठूलो राजनीतिक पार्टी एनभीआ सम्वद्ध नेताहरुले बेल्जियमवासी नेपालीहरु मिहेनती, इमान्दार र मिलनसार भन्दै प्रशंसा गरेका छन् ।

गैर आवासीय नेपाली संघ युरोप अध्यक्ष अर्जुन श्रेष्ठ र रमेश कंडेलको संयोजकत्वमा ब्रुजको कानिकास्थित सुसी रेष्टुरेन्टमा २८ जुलाइमा आयोजित एनभीआ ब्रुज र ब्रुजका नेपाली समुदायबीचको भेटघाटमा नेपालीको प्रशंसा भएको हो । एनभीआ ब्रुजकी उपाध्यक्ष इंग फान हुल्लकै सल्लाहमा कार्यक्रम तय भएको थियो ।

कार्यक्रममा एनभीआ बोर्ड सदस्य र प्रतिनिधिहरु गरि करिब २० जना अतिथी र त्यतिकै संख्यामा नेपाली सहभागी थिए । उक्त अन्तरक्रियामा एनभीआ बेल्जियमका सिनेटर पोल फान देन द्रिस्सले कार्यक्रममा बोलाएकामा एनभीआको तर्फबाट नेपाली समुदायलाई धन्यवाद दिंदै बेल्जियमको सम्वृद्धि र उन्नतिका लागि नेपालीहरुको आवश्यकता रहेको बताए । स्मरणरहोस्, बु्रजका नेपाली विशेषगरि होटल व्यवसाय र पर्यटन उद्योगमा संलग्न छन् ।

संक्षिप्त मन्तव्यका क्रममा एनभिआ अध्यक्ष प्रिम एर्वीनले यसअघि नेपालीहरु मिहेनती र इमान्दार हुन्छन् भन्ने सुनेको मात्र उल्लेख गर्दै आज प्रत्यक्ष भेटेर कुराकानी र परिचय गर्न पाउंदा खुशी लागेको जनाए । एर्वीनलाई नेपाली समुदायको तर्फबाट अर्जुन श्रेष्ठले शान्तिको प्रतिक बुद्धको मुर्तिसहित सम्मान गरे ।
एभरेष्ट नेपाली समाजका अध्यक्ष दुर्गा सुवेदी, निवर्तमान अध्यक्ष कमल पन्थीले नेपालीहरु इमान्दार, मिहेनती र समाजमा घुलमिल हुन सक्ने भन्दै बेल्जियमस्थित राजनीतिक पार्टीले प्रशंसा गर्नु सकारात्मक भएको उल्लेख गरे । अन्य सहभागीले यस्ता कार्यक्रमले स्थानीय समुदायमा नेपालीलाई समायोजन गर्न सघाउने बताएका थिए ।

कार्यक्रमको अन्त्यमा नेपालबाट आएका कलाकारहरु सत्यराज र स्वरुपराज आचार्यको गायनमा सहभागी रमाए । उक्त कार्यक्रममा स्वागत मन्तव्य र सञ्चालन रमेश कंडेलले गरेका थिए ।