बिबिसीका पत्रकारलाई स्वामी आनन्द अरुणको टिप्स

लण्डन । चौबीसै घण्टा ब्यस्त रहने ब्रिट्रिश ब्रोडकास्टिङ कर्पोरेसन (बिबिसी) का पत्रकारहरु बुधबार दिउँसो केही क्षणका लागि शान्त देखिन्थे । अक्सफोर्ड सर्कसस्थित अत्याधुनिक बिबिसी ब्रोडकास्टिङ हाउसको चौथो तल्लामा उनीहरु खोज्दै थिए सुखी जीवन जिउने उपाय । उनीहरुलाई दिव्ब्यज्ञान दिँदै थिए नेपालबाट आएका – स्वामी आनन्द अरुण ।
नजन्मँदै फास्टफुडबाट भोजनादि शुरु गर्ने लण्डनमा पत्रकारहरुलाई स्वामी अरुणको पहिलो सुझाव थियो खानेकुरामा ध्यान राख्नु । जीवनमा ध्यानको महत्व र गुणस्तरीय जीवन जीउने कला आदिका बारेमा आधा घण्टाको प्रवचनपछि सहभागीहरुको जिज्ञासा शान्त पार्दै अरुणले भने, ‘मनलाई शान्त राख्नका लागि पहिलो कुरा खानेकुरामा ध्यान दिन जरुरी छ ।’
सात्विक र पौष्टिक आहारयुक्त खाना खान सुझाव दिँदै उनले थपे, ‘अधिक भोजन र शरीरलाई अनावश्यक जोश दिने भोजनले मनलाई अस्थीर बनाउँछ ।’ भोजन र मस्तिष्कका बीचमा अन्योन्याश्रित सम्बन्ध रहने उल्लेख गर्दै उनले भने, ‘एक गिलास दुधले तपाईलाई बल दिन्छ तर एक गिलास रक्सीले तपाईलाई बल त दिन्छ नै साथसाथै अनावश्यक जोश पनि ।’
ब्यस्तता हेर्दा मानिस र यन्त्रमा फरक छुट्ट््याउनै गाह्रो पर्ने दैनिकी भएका पत्रकारहरुलाई उनको दोस्रो सिफारिस थियो –कम्तीमा ६÷७ घण्टा सुत्नु । ‘हामी जति ब्यस्त हुँदैछौँ निन्द्रा त्यति कम्ती हुँदैछ । कम्तीमा दैनिक ६÷७ घण्टा सुत्नु शरीरका लागि अत्यावश्यक छ । त्यसो भयो भने शरीर चङ्गा हुन्छ र जागा रहन कालो कफी खानै पर्दैन’ उनले भने ।
हाँसो त हाँसो तर धेरै बनावटी हाँसो पाइने लण्डनमा उनको आखिरी टिप्स थियो दिनमा कम्तीमा आधा घण्टा हाँस्नु । ‘धेरै गम्भीर बन्दाबन्दै हामीले आफैँलाई दुःखी बनाउँदैछौँ’ उनले भने । विश्वको एक गरिब देश भुटान कुल ग्रार्हस्थ खुशीको विश्वव्यापी सूचीमा पहिलो नम्बरमा रहेको तथ्यांक तेस्र्याउँदै उनले भने – धनी हुनु र खुशी हुनु फरक रहेछ ।
मनमा अनावश्यक मोह र आशक्ति राख्नाले मानिसले आनन्द र खुशीको अनुभव गर्न नपाएको मात्र होइन आपसमा द्वन्द्व निम्तिएको पनि उनको धारणा थियो । आशक्ति र मोह त्यागेर मात्र मानिसले स्वतन्त्र विचार दिनसक्ने उनले बताए । ध्यानले मानिसलाई त्यही आशक्तिबाट मुक्त राखेर नविन र स्वतन्त्र सोच सोच्न मौका दिने उनको दाबी थियो ।
करिब एक घण्टे आप्mनो प्रस्तुतिका क्रममा उनले नेपालको बारेमा धेरैपटक उल्लेख गर्न छुटाएनन् । नेपाल गरिब देश भएपनि त्यहाँका जनतामा निस्वार्थ निश्चल हाँसो पाइने उनले बताए ।
काठमाडौँस्थित ओशो तपोवनका प्रमुख स्वामी अरुण हरेक वर्ष ध्यान शिविर सञ्चालन गर्नका लागि लण्डन आउने गरेका छन् ।