बेलायतमा हुने १६ औं नेपाली मेलाको तयारी पूरा : तमुधीं यूके

लन्डन । बेलायतमा यही अगस्ट २४ तारिखमा हुने १६ औं नेपाली मेलाको तयारी पूरा भएको आयोजक तमुधीं यूकेले जनाएको छ ।

तमुधिं यूकेले आइतबार मिचेटस्थित आफ्नै भवनमा पत्रकार सम्मेलन गरी मेला तयारी पूरा भएको जानकारी दिइएको हो । नेपाली दूतावासको सहकार्यमा हुने मेला केम्पटन पार्क रेस कोर्समा हुनेछ ।

मेला संयोजक एवं संस्थाका उपाध्यक्ष कमल कोने गुरुङका अनुसार झण्डै ५१ हजार पाउण्ड खर्च हुने अनुमान छ । मेलामा विभिन्न जातजाति र संघसंस्थाको झांकी, लोकसंगीत, नृत्य, हस्तकला प्रदर्शन, परम्परागत भेषभूषा तथा परिकारहरु राखिने छन् । खाना तथा च्यारिटीका झण्डै ७० स्टल र अन्य कयौं आकर्षण रहने जानकारी दिनुभयो ।

मेलामा बेलायतका लागि नेपाली राजदूत चन्द्रकुमार घिमिरे प्रमुख अतिथि र उज्यालो नेपाल अभियन्ता नेपाल विद्युत् प्राधिकरणका पूर्वकार्यकारी निर्देशक कुलमान घिसिङ विशेष अतिथि रहनुहुनेछ ।

अध्यक्ष जुमकाजी अध्यक्ष गुरुङले गत वर्ष गोर्खा कपबाट संकलित रकममध्ये १० प्रतिशत नेपालको लमजुङमा च्यारिटी कार्यमा सहयोग गरिएको भन्दै नेपाली मेलामा समेत आम्दानी वचत भए खर्च गरिने जनाउनुभयो ।