कुलमान घिसिङ बेलायतमा

लन्डन । नेपाल विद्युत प्राधिकरणका पूर्वकार्यकारी निर्देशक कुलमान घिसिङ लन्डन आइपुग्नुभएको छ । ‘उज्यालो नेपाल’ अभियान लिएर विदेश घुमिरहनुभएका उहाँ सोमबार बिहान अमेरिकाबाट लन्डन आउनुभएको हो ।

एनआरएनए यूके, तमुधीं यूके, तामाङ सोसाइटी यूके, गुरुङ सोसाइटी केन्ट यूकेलगायत संघ संस्थाका अध्यक्ष तथा पदाधिकारी, शुभचिन्तकलगायतले हिथ्रोमा टर्मिनल २ मा घिसिङलाई भव्य स्वागत गरेका छन् ।

एनआरएनए यूकेले कुलमानसँग १५ अगस्ट साँझ अल्डरसटस्थित एम्पायर हलमा ‘मिट एन्ड ग्रीट’ गर्ने तयारी गरेको छ । उक्त कार्यक्रममा सहभागी भएर घिसिङसँग अन्तरक्रिया गर्दै ‘अन लिमिटेड थ्री कोर्स मिल’ को स्वादमा रमाउन संघका अध्यक्ष प्रेम गाहा मगरले अपिल गर्नुभएको छ ।

कार्यक्रममा बेलायत नेपाल सम्बन्ध र गोर्खाहरुको योगदान, नयाँ नेपाल निर्माण गर्ने उनको योजना, नेपालीका दु:ख सु:ख आदिबारे पनि अन्तरक्रिया हुने जनाइएको छ । सो अवसरमा तामाङ सेलो, खुकुरी डान्स, नौमति बाजा जस्ता प्रस्तुति रहने संघको भनाइ छ ।

तमुधीं यूकेले सोमबार साँझ मिचेटस्थित तमुधीं यूके भवनमा स्वागत तथा भेटघाटको कार्यक्रम राखेको अध्यक्ष जुमकाजी गुरुङले जानकारी दिनुभयो । उहाँले तमुधीं यूकेको निमन्त्रणमा बेलायत आउनुभएका घिसिङ २४ अगस्टमा केम्पर्टन पार्कमा आयोजना हुने नेपाली मेलामा विशेष अतिथिको रुपमा उपस्थित हुनुहुने जानकारी गराउनुभयो ।

घिसिङ बेलायतमा रहँदा विभिन्न नेपाली संघ संस्थाका कार्यक्रममा सहभागी हुनुहुने जनाइएको छ ।