नेफिन यूकेले मनायो विश्व आदिवासी दिवस : पुन र दुरालाई विशेष सम्मान

लन्डन । नेपाल आदिवासी जनजाति महासंघ (नेफिन) यूकेले विभिन्न कार्यक्रमसहित विश्व आदिवासी दिवस मनाएको छ ।

ग्याम्बलेनस्थित किरात हाउसमा अगस्ट ९ र १० तारिखमा विभिन्न व्यक्ति सम्मान, खेलकुदसहित विभिन्न प्रतिस्पर्धा गराइ आदिवासी दिवस मनाइएको हो । विश्वव्यापी रूपमा प्रत्येक वर्ष ९ अगस्टका दिन विश्व आदिवासी दिवस मनाइन्छ ।

नेफिन यूकेले पहिलो दिन भलिबल र छेलो खेल आयोजना गरेको थियो । भलिबल प्रतियोगितामा २१ टिमको सहभागिता रह्यो। युथ टिमतर्फ ग्रिनिच टिम प्रथम भई १,६०० पाउन्ड नगद पुरस्कार जित्न सफल भयो भने अल्डरसट टिम दोस्रो भयो । पुरुष भेट्रानतर्फ प्रथम ग्रिनिच भलिबल परिवार, दोस्रो स्याङ्जा यूके बने।

महिला टिमतर्फ प्रथम मोना यूके, दोस्रो म्यानचेस्टर टिम रह्यो । भलिबल प्रतियोगिताको संयोजन नेफिन यूकेका पूर्वअध्यक्ष कर्मा पहाडी शेर्पाले गर्नुभएको थियो ।

दोस्रो दिन, १० अगस्टमा, यूकेस्थित विभिन्न जातीय संगठनहरूले आफ्नो परम्परागत भेषभूषामा सुसज्जित भई झाँकी प्रदर्शन गरेका थिए। झाँकी प्रतियोगितामा प्रथम मगर संघ यूके, दोस्रो किरात याक्थुङ चुम्लुङ यूके र तेस्रो किरात राई यायोक्खा यूके बने ।

यस वर्षको आदिवासी वर्ष पुरुष २०२५ मा दुत पुन र आदिवासी वर्ष महिला २०२५ मा गंगामाया दुरालाई प्रदान गरिएको थियो ।

धनुषकाँड (आर्चरी) र छेलो खेलका विजेताहरूलाई समेत पुरस्कारसहित सम्मान गरिएको थियो ।

कार्यक्रमको सभापतित्व नेफिन यूकेका अध्यक्ष मेजर योगेश कोयी राईले र सञ्चालन महासचिव फ्रम दुराले गर्नुभएको थियो । कार्यक्रमस्थलमा खाना, सुनपसल, बुटिक, नेपाली भाँडाकुडा लगायतका स्टल राखिएका थिए ।