२/८१ इन्टेक नम्बरीको ४४औं वार्षिक भेला सम्पन्न, संकलित दुई लाख गोर्खा संग्रहालय र ट्रष्टलाई दिने

४५ औं वार्षिकोत्सव कार्यक्रम पोखरामा मनाइने

लन्डन । १९८१ मा भर्ती भएका २/८१ इन्टेक नम्बरीले विभिन्न कार्यक्रमसहित ४४औं वर्षगाँठ मनाएका छन् ।

शनिबार १० मे २०२५ मा ब्लुकोट स्कुल बेजिङस्टोकमा २/८१ इन्टेक नम्बरीले राफल ड्र, तम्बोला र अन्य आकर्षक कार्यक्रमसहित वर्षगाँठ मनाएका हुन् ।

संस्थाका अध्यक्ष सुनिल राना, शोभामान गोले र पूर्वअध्यक्ष मेजर खुशीमान गुरुङले दिप प्रज्वलन गरी कार्यक्रम उद्घाटन गर्नुभएको थियो । नम्बरी भेलामा उच्च शिक्षा हासिल गरेका, विवाह गरेका छोराछोरी र नातिनातिना भएकाहरुलाई खादा र प्रमाणपत्रसहित बधाई दिइएको थियो । उनीहरुले नम्बरीसँग खुशी बाँड्दै संस्थाका लागि प्रायोजन गरेको आयोजकले जनाएको छ ।

अर्को वर्ष ४५औं वार्षिक भेला नेपालको पर्यटकीय राजधानी पोखरा मनाउने भएकोले मेजर खुशीमान गुरुङको टिम (मेजर शोभित हमाल, रामलाल श्रेष्ठ र क्याप्टेन महेन्द्र लिम्बु र हङकङका संयोजक त्रिलोक गुरुङ)ले त्यसको गृहकार्यबारे जानकारी दिनुभएको थियो । संस्थाका सचिव शेर पुनले कार्यक्रम सञ्चालन गर्नुभएको थियो भने उपाध्यक्ष बेल बुराथोकीले स्वागत मन्तव्य राख्नुभएको थियो ।

अध्यक्ष सुनिल रानाले वार्षिक रुपमा हुने जमघटमा नम्बरीले विगत सम्झिँदै एकापसमा भलाकुसारी गर्ने अवसर भएको उल्लेख गर्नुभयो । उहाँले कार्यक्रममा उपस्थित तथा कारण बस उपस्थित हुन असमर्थ र प्रत्यक्ष-अप्रत्यक्ष सहयोग गर्ने बेजिङस्टोकका नम्बरीलगायत सबै नम्बरीहरुलाई धन्यवाद दिनुभयो ।

दोस्रो चरणमा भने मनोरञ्जनात्मक कार्यक्रम तम्बोला, राफल ड्र र नम्बरी नम्बर्नीको नाचगान चलेको थियो । लोक तथा दोहोरी गीत प्रतिष्ठान यूके शाखाका निवर्तमान अध्यक्ष टंक शेरचनको व्यंग्यात्मक मुक्तक प्रस्तुतिले कार्यक्रममा थप मनोरञ्जन दिलायो । नम्बरीका छोरीहरु संगीता गैरे र लुइजा नेपालीको नाच प्रस्तुतिले माहोल तातिएको थियो। सदाझैँ उमा गुरुङको एकल नाचले वाहीवाही पाएको थियो ।

कार्यक्रममा वेल्स, ग्रान्थम केन्टलगायत ठाउँबाट समेत नम्बरीहरु उपस्थित थिए । राफल ड्रमा पहिलो पुरस्कार एड्भेन्ट्रा जर्निज लिमिटेड (सुमन पुन)ले सुनको माला, दोस्रो पुरस्कार द प्यालेस रेस्टुरेन्टले (सुनको चन्द्रमा काँटा), तेस्रोमा युनिभर्सल गोर्खा सेक्युरिटी सेर्भिसेस (कृष्णराज तामाङ)ले नगद २ सय पाउन्डलगायत आकर्षक पुरस्कार नगद स्पोन्सर गर्नुभएको थियो ।

पहिलो पुरस्कार पशुपति गुरुङ, दोस्रो प्रतिभा श्रेष्ठ, तेस्रो सरिता गुरुङले जित्नुभयो ।

राफल ड्र र तोम्बोलाबाट उठेको दुई लाख रुपैयाँ आउने वर्ष ४५औं वार्षिकोत्सव कार्यक्रममा पोखराको गोर्खा संग्रहालय र गोर्खा वेलफेयर ट्रष्टलाई दिने निर्णय भएको संस्थाका कोषाध्यक्ष बेम थापाले जानकारी दिए । ४५ औं वर्षगाँठ २० देखि २२ फेब्रुअरी २०२६ मा मनाउने कार्यक्रम तय भएको छ।