गैरआवासीय नेपाली संघलाई एकजुट बनाउन म प्रतिबद्ध छु : प्रधानमन्त्री ओली

काठमाडौं । नेपालका प्रधानमन्त्री केपी शर्मा ओलीले गैरआवासीय नेपाली संघलाई एकजुट बनाउनका लागि आफू सदैव प्रतिबद्ध रहेको बताउनुभएको छ ।

गैरआवासीय नेपाली संघ (एनआरएनए) अध्यक्ष बद्री केसी समूहसँगको भेटमा प्रधानमन्त्री ओलीले एनआरएनएलाई गैर राजनीतिक बनाई संसारभरका गैरआवासीय नेपालीलाई एकजुट बनाउन आफू सदैव प्रतिबद्ध रहेको बताउनुभएको हो ।

सर्वोच्च अदालतको परमादेशअनुसार गठित एनआरएनए उच्चस्तरीय आयोगले एकता महाधिवेशन गरेर नयाँ नेतृत्व चयन गरेसकेको अवस्थामा बद्री समूहले नेकपा एमाले अध्यक्ष समेत रहनुभएका प्रधानमन्त्री ओलीसँग भेटवार्ता गरेका हुन् ।

यही मे ३ देखि ४ सम्म चलेको महाधिवेशनबाट एनआरएनएको अध्यक्षमा जापानवासी महेशकुमार श्रेष्ठको नेतृत्वमा नयाँ कार्यसमिति चयन भएको छ । उक्त महाधिवेन परराष्ट्रमन्त्री आरजु राणा देउवाले उद्घाटन गर्नुभएको थियो । नयाँ कार्यसमितिले आइतबार नै पद तथा गोपनियताको शपथग्रहण गरिसकेको छ ।