‘लिब्जु–भुम्जु पुरस्कार’ सोनाम सज्जन किरातीलाई

काठमाडौं । वाम्बुले (ओम्बुले) राई साहित्य प्रकाशनले २०८१ सालको ‘लिब्जु–भुम्जु पुरस्कार’ कवि सोनाम सज्जन किरातीलाई प्रदान गरिने निर्णय भएको छ । यो पुरस्कार वाम्बुले राई भाषाको ‘लिब्जु–भुम्जु’ (इक लिब्जु–भुम्जु) त्रैमासिक पत्रिकामा वर्षभरि छापिएका कवितामध्ये सर्वोत्कृष्ट एक रचनालाई प्रदान गरिदैआएको छ । कोशकार अविनाथ राईको संयोकत्वमा गठित पुरस्कार छनोट समितिले यो निर्णय गरेको हो ।

इक लिब्जु–भुम्जु त्रैमासिक पूर्णाङ्क २५ (लिब्जु–भुम्जुको ९८औं शृंखला), २०८१ साउन–असोजमा प्रकाशित कवि किरातीको ‘बुल्याम पो दाजु ब्अिम्सै हाहासिम’ (बुल्यामको बाउ दाजु सोच्दै भक्कानिए) शीर्षक कवितालाई पुरस्कारको निम्ति चयन गरिएको छ ।

यस कविताले ग्रामीण जनजीवनको चित्रण गरेको छ । रोजगारीका निम्ति सिलोङ गएका एक युवाले उतैबाट खसिनीलाई जीवनसंगीन बनाएर घर भित्र्याएपछिको
गृहस्थी जीवनको सुन्दर बयान छ । घरगृस्थी धान्ने परम्पराको मौलिकता आफ्नै छ तर पुर्खाले आर्जेको मातृभाषा र संस्कृति विस्तारै लोप हुँदै गरेको तथा युवा पुस्ताले बिर्सिदै गएको प्रसंगलाई काव्यमय ढंगले प्रस्तुत गरिएको छ
।

आमा प्रेमसरी राई र बुबा रन्जित राईको जेठो छोरा देवराज राई (सोनाम सज्जन किराती)को जन्म २०४३ माघ १० गते, हलेसी तुवाचुङ नगरपालिका–२ दाम्ली, खोटाङमा भएको हो । उहाँले स्नातक अध्ययन गर्नुभएको छ । कविता, निबन्ध, लेख लेख्दै आउनु भएको छ । कवि तथा लेखक किरातीको ‘नपुंसक स्वर्गको
विरुद्ध आगो’ (कविता संग्रह, २०७२) र ‘जनयुद्धमा बितेका पल’ (संस्मरण संग्रह, २०८०) प्रकाशित छन् ।

नेपाल टेलिभिजनमा कार्यरत वरिष्ठ पत्रकार तथा गीतकार पुष्पहरि क्याम्पा राईले ‘लिब्जु–भुम्जु पुरस्कार–२०५५’ स्थापना गर्नु भएको हो । यो पुरस्कारबाट हालसम्म २४ जना कविहरू पुरस्कृत भएका छन् । पुरस्कारको राशि पाँच हजार रुपैयाँ र सम्मान प्रमाणपत्र रहेको छ । यो पुरस्कार २०८२ मंसिर
२० गते ओखलढुंगाको मानेभन्ज्याङ गाउँपालिका–५ माथिल्लो रिचुवा गाउँमा हुने २५औं वाम्बुले राई भाषाको कविता प्रतियोगिता तथा गोष्ठीमा प्रदान गरिनेछ ।