बेलायतमा ‘नर्थहोल्ट टेन के रन’ सम्पन्न : पुरुषतर्फ इलियास र महिलामा फ्रान्सेस्का प्रथम

लन्डन । बेलायतमा नेपाल रन यूकेले आइतबार आयोजना गरेको १० किमि दौड प्रतियोगिताको पुरुषतर्फ इलियास अहमद र महिलातर्फ फ्रान्सेस्का बुट प्रथम भएका छन् ।

नर्थला पार्क, नर्थहोल्टमा आइतबार बिहान आयोजित ‘नर्थहोल्ट टेन के रन’ मा अहमदले निर्धारित दूरी ३९ मिनेट २९ सेकेन्ड र बुटले ३९ मिनेट ४४ सेकन्डमा पूरा गरेर पहिलो स्थान हासिल गर्नुभएको हो ।

प्रतियोगिताको अवसरमा नेपालको तर्फबाट चार पटक ओलम्पिक खेलमा सहभागी एवं साउथ एसिया म्याराथन रेकर्ड होल्डर बैकुण्ठ मानन्धर तथा धरान उपमहानगरपालिकाका मेयर हर्क साम्पाङको उपस्थिति थियो ।

दौडमा ३ सय ८० भन्दा बढी धावक सहभागी भएको कार्यक्रम संयोजक सन्तोष राईले जनाउनुभयो ।

कार्यक्रमको सुरुमा इलिङ्ग नर्थबाट निर्वाचित लेबर सांसद जेम्स मरीले शुभकामना दिनुभएको थियो । दौडमा नेपाली बाहेक अन्य समुदायका धावकहरु पनि सहभागी थिए।

बिहान ९ बजे केटाकेटीका लागि ‘चिल्ड्रेन टु के फन रन’ पनि आयोजना गरिएको थियो ।

फार्नबराबाट आएका स्कुले छात्राहरुले धावकहरुलाई पानी पिलाउने, फोहर उठाउने जस्ता काम गरेका थिए ।

रनको प्रमुख प्रायोजन ए स्टार फाइनान्सियल सोलुसन्स यूकेले गरेको थियो ।

अन्य प्रमुख सहयोगी संस्थाहरुमा रियल ड्रिम्स एडुकेसन कन्सल्टेन्सी, एइएसएन रिक्रुटमेन्ट , मेक्सवर्थ एकाउन्टेन्ट्स, मम हाउस ३६५, सह प्रायोजकहरुमा एसएनपी प्लस एकाउन्टिंग, किरात राई यायोक्खा, गोर्खा किचेन लगायत थिए । कार्यक्रममा नेपाली खानाको फुड स्टल पनि थियो ।

समुदायमा स्वास्थ्य र तन्दुरुस्ती को चेतना जगाउने, नेपालको पर्यटन तथा संस्कृति प्रवर्द्धन गर्ने, नेपाली खेलाडीहरुलाई सहयोगसाथै बैकुण्ठ मानन्धरले सुरु गरेको जुम्लामा ‘हाइ अल्टिच्युड ट्रेनिङ्ग क्याम्प’ बनाउन र गोर्खा वेलफेयर ट्रस्टलाई सहयोग गर्ने उद्देश्य रहेको संस्थापकमध्येका एक पदाधिकारी जगन कार्कीले बताउनुभयो ।