बेलायतवासी खेलाडी सन्तोष राईले वर्ल्ड ट्रायथलनमा प्रतिस्पर्धा गर्नुहुने

लन्डन । बेलायतवासी नेपाली खेलाडी सन्तोष राईले नेपालको प्रतिनिधित्व गर्दै वर्ल्ड च्याम्पियनसिप लङडिस्टेन्सवर्ल्ड ट्रायथलनमा प्रतिस्पर्धा गर्नुहुने भएको छ ।

अस्ट्रेलियाको नर्थ क्विन्सल्यान्डस्थित टाउन्स भेलमा अगस्ट २५ मा हुने वर्ल्ड च्याम्पियनसिपको एलिट विधामा सन्तोष र अमेरिका बोस्टनका सन्तोष कर्माचार्यले प्रतिस्पर्धा गर्न लाग्नुभएको हो ।

नेपाल ट्रायथलन संघले उक्त प्रतिस्पर्धामा पहिलो पटक नेपालको प्रतिनिधित्व गराउन उहाँहरूलाई छनोट गरेको जनाएको छ ।

ट्रायथलन प्रतियोगितामा ३ किमि पौडी, ११४ किमि साइक्लिङ र ३० किमि रनिङ हुनेछ । अस्ट्रेलिया जानुअघि सन्तोष राईले नेपाललाई प्रतिनिधित्व गर्दै भाग पाउँदा गर्व लागेको बताउनुभयो ।

वर्ल्ड ट्रायथलन च्याम्पियनसीपमा विश्वका ४० बढी देशका ३ हजार प्रतियोगी सहभागी हुँदै छन् ।सन् २००९ देखि दौड्न थाल्नुभएका राईले लन्डन, बर्लिन, न्यूयोर्क, सिकागो, बोस्टन, टोकियो जस्ता विश्वका ६ वटा फुल म्याराथन पूरा गर्ने उहाँ पहिलो नेपाली हुनुहुन्छ । दुई वर्षमा ती विश्वप्रसिद्ध म्याराथन सम्पन्न गर्नुभएको उहाँ नेपाल रन यूकेका संस्थापक हुनुहुन्छ ।

नेपाल रन यूके अहिले नेपाल र बेलायतका नेपाली खेलाडीलाई आर्थिक सहयोग प्रदान गर्न र खेल विकासमा क्रियाशील छ ।

धरान १० के रनका परिकल्पनाकार राई इंग्ल्यान्ड एथलेटिक्स र नर्थ वेस्ट रिजनल काउन्सिलको आयोजनामा सेप्टेम्बर २७ मा हुने नर्थ वेस्ट रिजनल भोलिन्टियर अवार्डमा वेस्ट कोच अफ द इयरका लागि मनोनीत हुनुभएको छ । सन्तोषलाई एनबीसी यूके र एनआरएनए यूकेले आर्थिक सहयोग गरेको छ ।

एनआरएनए यूके अध्यक्ष हित काजी गुरुङले सन्तोषको मिहिनेत र खेल लगावबाट आफू प्रभावित हुनुका साथै देशलाई चिनाउन जान लागेकाले संस्थागत प्रायोजन गरिएको जनाउनुभयो ।