नेपालका प्रधानमन्त्री ओलीद्वारा मन्त्रिपरिषद् विस्तार, ३ राज्यमन्त्री थप, को को ?

काठमाडौँ । नेपालका प्रधानमन्त्री केपी ओली नेतृत्वको मन्त्रिपरिषद्को संख्या २५ सदस्यीय भएको छ ।

नेपाली कांग्रेसबाट रुपा बिक र पूर्णबहादुर तामाङ तथा नागरिक उन्मुक्ति पार्टीबाट अरूण चौधरीसहित तीन राज्यमन्त्री शुक्रबार थपिनु भएसँगै ओली सरकार २५ सदस्यीय बनेको हो । प्रधानमन्त्री ओलीको सिफारिसमा राष्ट्रपति रामचन्द्र पौडेलले शुक्रबार तीन राज्यमन्त्री नियुक्त गर्नुभएको हो ।

प्रधानमन्त्री केपी शर्मा ओली शपथ लिनुभएकै दिन २२ सदस्यीय मन्त्रिपरिषद् गठन भएको थियो । संविधान अनुसार मन्त्रिपरिषद् २५ सदस्यीय भन्दा ठूलो बनाउन पाइँदैन । संविधानअनुसार अब मन्तिपरिषद्ले पूर्णता पाएको छ ।

मन्त्रिपरिषद‌्मा दलितलाई समावेश नगरिएको भन्दै आलोचना भएपछि अहिले राज्यमन्त्री थपेर समावेशी बनाउन खोजिएको छ । बिकलाई वन तथा वातावरण राज्यमन्त्री बनाइएको छ । तामाङलाई उर्जा जलस्रोत तथा सिंचाई राज्यमन्त्रीको जिम्मेवारी दिइएको छ ।

चौधरीलाई संस्कृति पर्यटन तथा नागरिक उड्ययन मन्त्रालयको राज्यमन्त्रीको जिम्मेवारी दिइएको छ ।

चौधरी कैलाली-२ बाट निर्वाचित हुनुहुन्छ । कपिलवस्तुकी बिक कांग्रेसकी समानुपातिक सांसद हुनुहुन्छ भने तामाङ रामेछापबाट निर्वाचित सांसद हुनुहुन्छ ।