नेपालका तीन प्रदेशमा नयाँ प्रमुखहरू नियुक्त, कहाँ को ?

काठमाडौं । नेपालका तीन प्रदेशमा नयाँ प्रदेश प्रमुखहरू नियुक्त हुनु भएको छ ।

राष्ट्रपति रामचन्द्र पौडेलले बुधबार बागमतीमा दीपकप्रसाद देवकोटा, लुम्बिनीमा कृष्णबहादुर घर्तीमगर र कर्णालीमा यज्ञराज जोशीलाई नियुक्त गर्नुभएको हो । उहाँले साउन १४ गते बसेको मन्त्रिपरिषद् बैठकको निर्णयअनुसार सरकारले गरेको सिफारिसका आधारमा प्रदेश प्रमुखहरु नियुक्त गर्नुभएको हो ।

कैलालीको धनगढीका देवकोटा नेकपा एमालेको कोटामा प्रदेश प्रमुख नियुक्त हुनुभएको हो । उहाँ एमालेको केन्द्रीय अनुशासन आयोग सदस्य हुनुहुन्छ ।

रोल्पाका घर्तीमगर र बझाङका जोशी नेपाली कांग्रेसका तर्फबाट प्रदेश प्रमुख बन्नुभएको हो । घर्तीमगर कांग्रेस रोल्पाका पूर्वसभापति र जोशी कांग्रेस केन्द्रीय सदस्य हुनुहुन्छ ।

यसअघि बागमतीमा यादवचन्द्र शर्मा, लुम्बिनीमा अमिक शेरचन र कर्णालीमा तिलक परियार प्रदेश प्रमुख हुनुहुन्थ्यो । शर्मा नेकपा (एकीकृत समाजवादी), शेरचन र परियार नेकपा माओवादी केन्द्र निकट हुनुहुन्छ । उहाँहरु तीनैजनालाई माओवादी केन्द्र अध्यक्ष पुष्पकमल दाहाल प्रचण्ड नेतृत्वको सरकारले नियुक्त गरेको थियो ।