गोरखाहरुलाई आकर्षक प्रतिफलको आशा देखाएर ठग्ने अदालतबाट दोषी ठहर

लण्डन । गोरखा सैनिकहरुलाई आकर्षक प्रतिफलको आशा देखाएर लगानी गर्न लगाउने नक्कली व्यापारिक योजनाका योजनाकारलाई बेलायतको अदालतले दोषी ठहर गरेको छ ।

क्यापिटल वर्ल्ड मार्केट्सका सन्चालक ४१ वर्षीय एन्थोनी कोस्टानटिनुलाई सोमबार बेलायतको सदक क्राउन अदालतमा जुरीले दोषी ठहराएको हो ।

उनले नेपाली मूलका गोरखाहरुसहित विभिन्न लगानी कर्ताहरूबाट ७० मिलियन पाउण्ड उठाएका थिए । उनलाई ठगीलगायतका सात वटा अभियोगहरूमा दोषी ठहराइएको छ ।

उनले गोरखा सैनिकहरूलाई मासिक पाँच प्रतिशत लाभ दिने योजना ल्याएका थिए । तर उनको कार्यालयमा सिटी अफ लण्डन प्रहरीले छापा मार्दा ठगी धन्धा गरेको पाइएको थियो ।

शुरुमा अदालतमा भएका सुनुवाइमा कोस्टानटिनु उपस्थित हुने गरे पनि केही समयपछि नै सम्पर्कविहीन भएका थिए । उनको प्रतिनिधित्व उनका वकिलले गर्दै आएका छन् भने उनी विरुद्ध अन्तर्राष्ट्रिय पक्राउ पुर्जी जारी गरिएको छ ।

उनलाई जुन ९ मा सजायँ तोकिने बताइएको छ ।