बर्लिनमा एक्वेरियम विस्फोट

बर्लिन । बर्लिनमा शुक्रबार रेडिसन ब्लु होटलको एक विशाल एक्वेरियम विस्फोट भएको छ । विष्फोटपछि त्यहाँ रहेका करिब एक हजार ५०० माछा होटल परिसर र नजिकैको सडकमा छरपस्ट भएपछि सबै माछा मरेका छन् ।
स्थानीय समयअनुसार बिहान ५:५० बजे १४ मिटर अग्लो बेलना आकारको सो एक्वेरियम विस्फोट हुनुको कारण खुल्न नसकेको प्रहरीले जनाएको छ ।
बर्लिनको अग्नि नियन्त्रक विभागका प्रवक्ताले एएफपीसँग भन्नुभयो, “एक्वेरियम रहेको होटल परिसरको भुइँतलामा रहेको १० लाख लिटर पानी र भित्रका सबै माछा बगेर मरेका छन् ।”
होटलका अतिथिहरूले ठूलो धमाका र सानो भूकम्प गएजस्तो आवाजपछि आफूहरू ब्यूँझिएको रिपोर्ट गरेका छन् ।
सिसाको छर्राबाट दुई जनालाई हल्का चोट लागेको र उनीहरुलाई अस्पताल लगिएको र सबै माछा मरेको बताइएको छ ।
बर्लिनका मेयर फ्रान्जिस्का गिफीले भन्नुभयो, “यो पूर्ण सुनामीजस्तै थियो ।” भाग्यबस यो घटना बिहानै भएको थियो र निकै थोरै मानिस मात्र घटनास्थल वरपर थिए ।
उहाँले भन्नुभयो, “हामीले देखेको भयानक विनाशको बावजुद संयोगबस मानिसहरू गम्भीर घाइते भएका छैनन् ।” उनले पत्रकारहरूसँग भन्नुभयो । ट्याङ्कीमा रहेका एक हजार ५०० माछालाई भने बचाउन नसकिएको गिफीले बताउनुभयो ।
घटनास्थलमा तत्काल १०० भन्दा बढी आपतकालीन कर्मचारीहरू पुग्दा घटनास्थल सिसा र अन्य भग्नावशेषले छरपष्ट थियो ।
बेलना आकारको उक्त विशाल एक्वेरियम लामो समयदेखि बर्लिनमा एक लोकप्रिय पर्यटक आकर्षणका रूपमा रहेको थियो ।
सी लाइफ वेबसाइटका अनुसार, एक्वेरियम विश्वको सबैभन्दा ठूलो बेलना आकार (फ्रीस्ट्यान्डिङ एक्वैरियम) हो ।
होटलकी अतिथि क्लाउडिया गोन्जालेसले एक्वेरियम फुट्दा आफू ओछ्यानबाट लडेको बताउनुभयो । उहाँले एएफपीसँग भन्नुभयो, “उक्त समय आतिशबाजीको जस्तो आवाज आएको थियो र होटल भित्रभित्रै हल्लिएको थियो ।”
होटल वरपरको क्षेत्र दिउँसोसम्म सिल गरिएको थियो ।
पानीको बाढीले झ्याल र ढोका हरू भत्काएर होटल बाहिरको गल्लीमा कुर्सी, टेबुल र साना विरूवाका गमलाहरू लडाएको थियो । होटेलमा बस्ने पाहुनाहरूबाट अनलाइनमा प्रसारित तस्वीरहरू र भिडियोहरूमा पारदर्शी एक्वेरियममा व्यापक क्षति भएको देखिन्छ । त्यहाँ केवल फ्रेम मात्र देखिन्छ ।