शेरचन शुक्रबार सगरमाथातर्फ लाग्ने

काठमाडौं। सगरमाथा आरोहण गर्ने जेष्ठ नागरिक बन्ने अभियानमा रहेका म्याग्दीका आरोही मीनबहादुर शेरचन शुक्रबार सोलुखुम्बुतर्फ लाग्ने भएका छन् । सात वर्षअघि ७६ वर्षको उमेरमा सगरमाथा शिखर पुगेर उनले सर्वाधिक वृद्ध आरोहीको विश्वकीर्तिमान कायम गरेका थिए।

उनले कीर्तिमान बनाएको पाँच वर्षपछि जापानका ८० वर्षीय युसिरो मिउराले उनको रेकर्ड तोडेका थिए । अहिले आएर शेरचन उक्त रेकर्ड आफ्नै नाममा ल्याउन लागिपरेका हुन् । ८३ वर्ष ९ महिना उमेरका शेरचन शुक्रबार (वैशाख ११) मा रेकर्ड बनाउने उद्देश्यले सगरमाथातर्फ जाँदैछन् ।

‘मेरो आरोहणले वृद्धवृद्धालाई साहस, युवालाई उत्साह र संकल्प तथा सबैलाई लक्ष्यमा पुग्ने प्रेरणा प्रदान गर्ने छ,’ बुधबार आयोजित पत्रकार सम्मेलनमा शेरचनले भने, ‘आरोहणका लागि मेरो स्वास्थ्य स्थिति राम्रो छ । आरोहण अनुमति प्रदान गरेकोमा सरकारप्रति कृतज्ञ छु ।’ शेरचन पूर्व गोर्खा सैनिक हुन्।

उनको आरोहणका लागि आर्थिक सहयोग गैर आवासीय नेपाली संघ बेलायत तथा प्राविधिक र व्यावसायिक जिम्मेवारी हिमालयन गाइड्स नेपालले लिएको आरोहण संयोजक दुर्गाबहादुर बुढाले बताए।

बुधबार कार्यक्रममा उनलाई सहयोग गर्न जुटीरहेका गैर आवासीय नेपाली सङ्घ (एनआरएन) का अन्तर्राष्ट्रिय समितिका सदस्य सुषमा राई र एनआरएन, बेलायतका कल्पना आङबुहाङले शेरचनलाई सहयोग गर्न पाएकोमा गर्व लागेको बताए । ‘यति ठूलो अभियानमा जुट्नु भएको गोर्खालाई सहयोग गर्न पाउँदा खुसी छौ, आङबुहाङले भनिन् ।

उनले २ वर्षअघि मिउराको कीर्तिमान भंग गर्ने कोसिस गरेका थिए तर सफल भएन। शेरचनले सरकारी असहयोगको कारण असफल भएको बताए। ‘ढिलो गरि आरोहण अनुमति र बिरामी परेर आरोहण गर्न नसकेको अफवाह फैलाइयो’, उनले भने ।