एनआरएनए युके अध्यक्षमा मंगलबार उम्मेदवारी घोषणा गर्दै दीपक श्रेष्ठ

लन्डन । एनआरएनए इङ्ल्याण्ड राज्य समितिका अध्यक्ष दीपक श्रेष्ठले युकेको एनआरएनए राष्ट्रिय समन्वय समितिको आगामी कार्यकालका लागि अध्यक्ष पदमा मंगलबार आफ्नो उम्मेदवारी घोषणा गर्ने भएका छन् ।

साँझ साढे ६ बजे एक भर्चुअल कार्यक्रम आयोजना गरी उनले आफ्नो उम्मेदवारी औपचारिक घोषणा गर्न लागेको बताए ।

‘बेलायतस्थित नेपाली समुदायका अग्रज, संघसंस्थाका प्रतिनिधि, एनआरएनए अभियन्ताहरु र संचारकर्मीहरु साक्षी राखेर मैले आफ्नो उम्मेदवारीको औपचारिक घोषणा गर्दैछु’, श्रेष्ठले भने, त्यही अवसरमा मैले आम सदस्यहरुमाझ आफ्ना एजेन्डा र प्रतिबद्धताहरु पनि सार्वजनिक गर्नेछु ।’

एनआरएनए युकेको आगामी नेतृत्वका लागि एक सशक्त दाबेदारका रुपमा मैदानमा आएका छन् श्रेष्ठ । एनआएनए इंग्ल्याण्डको वर्तमान कार्यसमितिमा अध्यक्ष रहेका उनले आफ्नो क्रियाशिलताबाट धेरैको मन जितेको दाबी गर्छन् ।

यसअघि सन २०१५-१७ मा मुछेत्र गुरुङको कार्यकालमा उनी कोषाध्यक्ष रहेका थिए । २०१७-१९ को कार्यसमितिका लागि श्रेष्ठले उपाध्यक्षमा उम्मेदवारी दिएका थिए ।

श्रेष्ठले एनआरएनएबाहेक बुद्ध फाउन्डेसन युके, कपिलवस्तु समाज युकेसहितका संस्थाको सम्हालिसकेका छन् भने बेलायत तथा नेपालस्थित कैयौं सामाजिक संस्थामा आबद्ध रहेर परोपकारी कार्यहरुमा पनि निरन्तर सक्रिय रहंदै आएका छन्।