पत्रकार महासंघ कुवेतको अध्यक्षमा नवराज पन्थी

लण्डन । नेपाल पत्रकार महासंघ कुवेत शाखाको अध्यक्षमा नवराज पन्थी चयन भएका छन् ।

शाखाको शुक्रबार भर्चुअलरुपमा सम्पन्न अधिवेसनले पन्थीको अध्यक्षतामा ११ सदस्सीय कार्यसमिति सर्वसम्मत रुपमा निर्वाचित गरेको हो । नवनिर्वाचित समितिमा उपाध्यक्ष एक राज मल्ल, सचिव चन्द्र विक, सहसचिव हरि बानियाँ, कोषाध्यक्ष मनोज थापा र सदस्यहरुमा सुरेश गुरुङ, विजय धामी, प्रेम जिमी, विजय लामा र आकाश शेर्पा रहेका छन् । एक पद पछि पूर्ति गरिने बताइएको छ ।

शाखाका अध्यक्ष हरिकृष्ण न्यौपानेको अध्यक्षतामा सम्पन्न अधिवेसनमा प्रमुख अतिथि रहेका कुवेतका लागि नेपाली राजदुत दुर्गाप्रसाद भण्डारीले नवनिर्वाचित समितिलाई बधाई तथा शुभकामना व्यक्त गर्नुभएको थियो ।

अधिवेसनमा नयाँ नेतृत्व चयन गर्न जय आलेको संयोजकत्वमा दिल पाख्रिन र लोमस बाँस्तोला रहेको एक निर्वाचन समिति गठन गरिएको थियो । संयोजक आलेले नयाँ कार्यसमितिको नाम वाचन गरेका थिए ।

अधिवेसनलाई नेपाल पत्रकार महासंघ कतार शाखाका अध्यक्ष करिम बक्स मियाँ, बेल्जियमका अध्यक्ष ओम शर्मा, पोर्चुगल शाखाका अध्यक्ष योगेन्द्रमिलन छन्त्याल, जापानका अध्यक्ष मोहन घले, बेलायतका अध्यक्ष नरेश खपाङ्गीमगर, कोरियाका अध्यक्ष रन्जनराज कुँवर, युरोपका अध्यक्ष केजिन राई, प्रवासी पत्रकार सन्जालका अध्यक्ष दामोदर नेपाल, गैरआवासीय नेपाली संघ कुवेतका अध्यक्ष सुजन केसी, नेपाल अमेरिका पत्रकार संघका पूर्व अध्यक्ष आङछिरिङ शेर्पा,  भारत शाखाका महासचिव अर्जुन खनाल, युएई शाखाका अध्यक्ष भूपराज बस्याल, वरिष्ठ पत्रकार भगिरथ योगी, श्रम पत्रकार सन्जालका अध्यक्ष सुनिल न्यौपाने लगायतले शुभकामना दिएका थिए ।

अधिवेसनमा समितिको गतिविधि सचिव आनन्द आचार्यले पेश गरेका थिए ।