एनआरएनए महिला विभागद्वारा नेपाली फर्काउन आग्रह

अमेरिका । गैरआवासीय नेपाली संघ (एनआरएनए) महिला विभागले वैदेशिक रोजगारीमा आएका नेपालीहरुलाई क्वारेन्टाइनको व्यवस्थासहित नेपाल फर्काउन आग्रह गरेको छ । मंगलबार कन्फ्रेन्स वैठकमा वैदेशिक रोजगारीमा आएका नेपालीलाई फर्काउन पहलका लागि एनआरएनएमार्फत नेपाल सरकारलाई आग्रह गरिएको हो ।

विश्वभर रहेका नेपालीहरुलाई दैनिक जीवनयापनमा समस्या भए एनआरएनएमा सम्पर्क गर्न अनुरोध गरिएको छ । विभिन्न देशका राष्ट्रिय समन्वय परिषद (एनसीसी) सँगको समन्वयमा दुखमा परेका नेपालीहरुलाई तत्काल राहत उपलब्ध गराउन महिला विभागले संघको अन्तराष्ट्रिय परिषद (आइसीसी) सँग सहयोगको अपेक्षा पनि गरेको छ ।

सवै एनसिसिहरुलाई नेपालीहरुलाई परेको समस्या तत्काल रिपोर्टिङ गर्न र सहयोगको वातावरण मिलाउन पनि अनुरोध गरेको छ । बैदेशिक रोजगारीमा आएका विश्वभरका नेपालीहरु जो नेपाल फर्किन चाहन्छन्, उनीहरुलाई जतिसक्दो छिटो आफ्नो देश फर्काउने वातावरण बनाउन गैरआवासीय नेपाली संघ, महिला विभागले नेपाल सरकारसँग माग गरेको छ ।

बैदेशिक रोजगारीमा आएका नेपाली फर्कदा संक्रमण भित्र्याउन नदिन नेपालका बन्द अवस्थामा रहेका होटलहरुलाई क्वारेन्टाइनमा प्रयोग गरि फर्केका नेपालीलाई राख्न सरकारलाई सुझाएको छ । साथै त्यस्ता नेपालीहरुका स्वास्थ्य जाँच गराएर एनआरएनए मार्फत नेपाल सरकारसँग आग्रह गरेको छ ।

महिला विभागको भिडियो कन्फ्रेन्स पहिलो वैठकमा एनआरएनए अभियन्ता रवीना थापा र भूमा लिम्बुले संयोजनकारी भूमिका निर्वाह गरेका थिए । एनआरएनए उपाध्यक्ष रवीना थापा महिला तथा यूवा विभागमा संयोजक छिन् भने एनआरएनए महिला विभागमा भूमा लिम्बु संयोजक छिन् ।