एनआरएनए कोभिड-१९ राहत र ब्यबस्थापन नेपाल सरकारसँग समन्वयमा

काठमाडौं । गैरआवासीय नेपाली संघको पदाधिकारीहरुको बैठकले कोरोना भाइरस (कोभिड १९) प्रभावितलाई राहत र ब्यबस्थापनको लागि नेपाल सरकारसँग मिलेर अघि बढने निर्णय गरेको छ।

गैरआवासीय नेपाली संघ (एनआरएनए) को १९ अप्रिल आइतबार बसेको पधाधिकारीहरुको बैठकले उक्त निर्णय गरेको जानकारी संघका प्रवक्ता डिबी क्षेत्रीले दिएका हुन् । उनका अनुसार बैठकले अध्यक्ष कुमार पन्तलाई त्यसका लागि नेपाल सरकारसँग बिशेष पहल गर्न जिम्मा दिएको छ ।

कोभिड १९ का कारण विदेशमा संक्रमित, मृतक र अप्ठेरोमा परेका नेपालीहरुको लागि आवश्यक राहत सहयोग र उद्धारलगायत काम गर्न एनआरएनए एक्लैले नसक्ने निष्कर्ष बैठकको छ ।

नेपाल सरकारले बिभिन्न मुलुकमा कुटनीतिक प्रयास गर्नुपर्ने भएकाले सरकारको साथ चाहिने ठम्याई बैठकको छ । ‘कतिपय गैरआवासीय नेपाली संघको क्षेत्राधिकर र कर्तब्यभित्र पर्न जान्छन्’, प्रवक्ता क्षेत्रीले भने, ‘कतिपय नेपाल सरकारले गर्नुपर्ने काम हुन्छ । यसकारण सरकारसँग मिलेर अघि बढनुपर्ने अवस्था छ ।’

एनआरएनए अध्यक्ष पन्तले नेपाल सरकारसँग समन्वय गरि सोहि अनुरुप भएको सहमतिका आधारमा काम गर्ने निर्णय बैठकले गरेको छ। प्रवक्ता क्षेत्रीका अनुसार अध्यक्ष पन्तबाट नेपाल सरकारसँग भएका सहमतिको योजनासहित संघको आधिकारिक जानकारी नियमित रुपमा आउनेछ ।