नेपाली दूतावासमा गर्न लागिएको खाना महोत्सव स्थगित

लन्डन । लन्डनस्थित नेपाली दूतावास र नेप्लिज सेफ एसोसिएसन यूकेको सहकार्यमा गर्न लागिएको ‘खाना महोत्सव’ स्थगित भएको छ ।

बेलायतमा समेत कोरोना भाइरस संक्रमण 
फैलिने क्रम बढेपछि जनस्वास्थ्यको ख्याल गर्दै उक्त कार्यक्रम स्थगित गरिएको हो । आउंदो अप्रिल ६ तारिख सोमबार दूतावासमा महोत्सव गर्ने तयारी थियो ।

दूतावासका उपनियोग प्रमुख शरदराज आरनले वर्तमान परिस्थितिलाई मध्यनजर गर्दै कार्यक्रम स्थगित गरिएको जानकारी दिए । पछि नयां मिति तय गरिने दूतावासले जनाएको छ ।

महोत्सवमा बेलायतस्थित विभिन्न मुलुकका कुटनीतिज्ञ, स्थानीय मेयर, काउन्सिलरसहित करिब ५ सय जना गैरनेपाली समुदायका अतिथिहरु निम्त्याउने बताइएको थियो । बेलायतमा नेपाली ‘कुइजिन’ प्रवर्धन गर्ने महोत्सवको खास लक्ष्य हो । एसोसिएसनका प्रवक्ता राजु बोहोराले यसबाट पर्न गएको असुविधाप्रति दुःख व्यक्त गर्दै नयां मिति तय भएपछि जानकारी दिइने र कार्यक्रम विगतकै योजना अनुसार भव्य गरिने बताए ।

कोरोना भाइरसका कारण अहिले विश्व नै आतंकित छ । बेलायतमा यही भाइरसका कारण मंगलबारसम्म ६ जनाले ज्यान गुमाइसकेका छन् भने ३७३ जनामा संक्रमण भएको छ ।