एनआरएनए यूके महिला फोरमको सेमिनार तयारी पुरा

लन्डन । एनआरएनए यूके महिला फोरमले आगामी ८ मार्चमा गर्न लागेको महिला सशक्तिकरण सम्बन्धि अन्तर्राष्ट्रिय सेमिनारको तयारी पुरा भएको छ ।

लन्डन इस्टकोटस्थित ‘भेन्यू फाइभ रेष्टुरेन्ट’ हलमा हुने उक्त सेमिनार अन्तर्राष्ट्रिय नारी दिवसका अवसरमा गर्न लागिएको हो । सेमिनारलाई एनआरएनए यूकेले पनि पूर्ण सहयोग गर्दैछ ।

उक्त सेमिनारका लागि नेपालबाट चर्चित सञ्चारकर्मी सबिना कार्की र मध्यपूर्वबाट महिला अधिकारकर्मी डा. मिना पौडेल लन्डन आउने निश्चित भइसकेको छ ।

बेलायतस्थित विज्ञहरु डा. पुनम यादव, डा. सारा पार्कर र सिवानी घले पनि प्रमुख वक्ता तथा प्यानलिष्टमा रहने महिला विभाग प्रमुख एवं एनआरएनए यूके महिला संयोजक प्रसुना कंडेलले जनाइन् ।

सेमिनारमा ‘नेपालको प्रोत्साहन र खतरारहित मर्यादा’ विषयमा डा. सारा पार्कर, ‘सामाजिक संजाल: सशक्तिकरण वा नियन्त्रणको माध्यम’ विषयमा संचारकर्मी सबिना कार्की र ‘समसामयिक नेपालमा व्यक्तित्वको सामाजिक, सांस्कृतिक निर्माण’ विषयमा डा. मिना पौडेलले प्रश्तुति दिनेछिन् । त्यस्तै प्रेरणादायी युवाको रुपमा गौरिका सिंहले सम्बोधन गर्नेछिन्।

त्यसैगरी ‘समसामयिक महिलावादबारे अन्तरपुस्ता दृष्टिकोण’ विषयक ‘प्यानल डिस्कसन’ हुनेछ । ‘प्यानल डिस्कसन’ र प्रश्नोत्तरको मध्यस्तता बिमला सेने र प्रसुना कंडेलले गर्नेछन् ।

बेलायत र नेपालमा रहेका नेपाली महिलाका समस्या पहिचान गरि समाधानको बाटो पहिल्याउन सेमिनार महत्वपूर्ण हुने विश्वास व्यक्त गर्दै संयोजक कंडेलले सहभागिताका लागि सबैमा अनुरोध गरेकी 
छन् । कार्यक्रमबाट आउने निचोडलाई प्रतिवेदनका रुपमा तयार गरि नेपालमा सम्बन्धित निकायसम्म पुरयाइने सोच रहेको प्रसुनाले बताइन् ।

अन्तर्राष्ट्रिय नारी दिवसका अवसरमा विगत वर्षहरुमा वर्षेनी कार्यक्रम गरिएपनि आसन्न सेमिनार जस्तो गहन मुद्दा उठाइएको थिएन ।

कार्यक्रमको रुपरेखा