पोर्चुगलमा विशेष कार्यक्रमसहित नेपाल भ्रमण वर्ष शुभारम्भ

लिस्बन, पोर्चुगल । पोर्चुगल राजधानी लिस्बनमा एक विशेष कार्यक्रमबीच नेपाल भ्रमण वर्ष २०२० शुभारम्भ गरिएको छ । राजधानी लिस्बनको ब्यस्त पर्यटकीयस्थल रोसियो स्क्वायरमा बुधबार कार्यक्रम भएको हो ।

राष्ट्रिय झण्डा, भ्रमण वर्षको प्ले कार्ड र ब्यानर बोकेर भेला भएका सयौं नेपालीले राष्ट्रिय भावनाले ओतप्रोत गीतहरु गाउंदै नेपालको कला-संस्कृति, प्राकृतिक सौन्दर्यता र बुद्धको जन्मस्थल लुम्बिनीबारे प्रचारप्रसार गरेको कार्यक्रम संयोजक पत्रकार राजकुमार थापाले बताए ।

जनवरी १ तारिख अन्तर्राष्ट्रिय नेपाली टोपी दिवस समेत परेको अवसरमा आ-आफ्नो शीरमा टोपी सजाएर भेला भएका महिला, पुरुष र बालबालिकाको सहभागिताले भ्रमण वर्ष प्रारम्भलाई अझ विशेष बनाएको थियो ।

कलाकारहरुले नेपाली मौलिक बाजा मादल, मुरली, बांसुरी बजाउंदै राष्ट्रिय गीतहरु गाउंदा कयौं विदेशीहरुले चासो दिएर नेपालबारे जानकारी लिएका थिए ।

भ्रमण वर्ष प्रारम्भ सभामा नेपाली पर्यटनदूत रमेशकुमार गुरुङले नेपाल भ्रमण वर्षको महत्व र उद्देश्यबारे बताउंदै नेपाल भ्रमण गर्न आव्हान गरेका थिए । एनआरएनए पोर्चुगलका अध्यक्ष तिलक गैरेले पोर्चुगलका गैर आवासीय नेपालीहरुले नेपाल भ्रमण वर्ष सफल बनाउन हरसम्भव प्रयास गर्ने विश्वास व्यक्त गरे ।

कार्यक्रमको संयोजन र सञ्चालन गरेका पत्रकार राजकुमार थापाले भम्रण वर्ष र टोपी दिवसका विविध आयामबारे प्रकाश पारेका थिए ।