एनआरएनए यूकेको मतगणना सुचारु गर्न दुवै पक्षबीच सहमति, गणना बिहीवार बिहानबाट

लन्डन । एनआरएनए यूकेको अवरुद्ध मतगणना सुचारु गर्न दुवै पक्षबीच सहमति भएको छ ।

अध्यक्षका दुई प्रत्यासी शेर सुनार र पुनम गुरुङ समूह, निर्वाचन आयोग तथा एनआरएनए केन्द्रिय नेताहरुबीच लामो वार्तापछि बुधवार राती एक बजे सहमति बनेर गणना बिहीवार बिहान १० बजेबाट शुरु हुने भएको हो । 

वार्तामा सहभागी एनआरएनए उपाध्यक्ष कुल आचार्यले विवादपछि निवेदन परेका बेजिङस्टोक र ह्यारो बुथको मत छानवीन पछि मात्र अन्तिममा गन्ने सहमति भएको जनाए ।

छानवीन समितिमा कर्नेल यमबहादुर राना, मेजर कृष्ण बहादुर गुरुङ र उमेश मोक्तान छन्। उक्त समितिले विवादपछि निवेदन परेका बेजिङस्टोक र ह्यारो बुथको छानवीन गर्ने छ ।  

स्कटल्याण्ड, नर्दन आयरल्याण्ड र वेल्सको मतगणना भइसकेको छ भने अब बाँकी इंग्ल्याण्डका १० मध्ये बेजिङस्टोक र ह्यारो बुथबाहेकको मत गनिने छ । 

मतगणना सुचारु गर्न एनआरएनए केन्द्रिय तहबाट पनि लिखित निर्देशन आएको थियो भने बेलायतस्थित केन्द्रिय नेताहरुले पनि सहमतिका लागि प्रयास जारी राखेका थिए ।  

एनआरएनए यूकेको नयां कार्यसमिति चयनका लागि गत शनिबार १४ सेप्टेम्बरमा निर्वाचन भएको थियो । तर, अध्यक्षका एकजना प्रत्यासी शेर सुनार समूहले
बेजिङस्टोक बुथमा धांधली भएको भन्दै मतगणना बहिष्कारपछि गणना अवरुद्ध भएको थियो ।  

पुनम समूहले हजारौं मतदाताको भावनामाथि खेलवाड नगर्न चेतावनीसहित गणना तत्काल थाल्न दवाव दिइरहेको थियो। यद्यपि गणनाबाट बाहिरिएको शेर समूहलाई समावेश गरेर लैजान छलफल जारी थियो ।