एनआरएनए यूके निर्वाचन: गुरुङको खारेज, भाग्यले लिए फिर्ता

लण्डन । गैरआवासीय नेपाली संघ बेलायतको आसन्न निर्वाचनका लागि युवा संयोजकमा उम्मेदवारी दिएका हेमकुमार गुरुङको उम्मेदवारी खारेज भएको छ । उनीविरुद्ध उजुरी पछि मंगलबार बसेको एनआरएनए यूके निर्वाचन समिति बैठकले उमेर हद पार गरेको भन्दै युवा संयोजकका प्रत्यासी गुरुङको उम्मेदवारी खारेज गरेको हो ।

तरपनि, एनआरएनए यूके युवा संयोजकमा नवीन गुरुङ र तीर्थबहादुर मल्ल (अनिल) मैदानमा छन् ।

निर्वाचन समितिका अनुसार सचिवका उम्मेदवार भाग्यनारायण रायले उम्मेदवारी फिर्ता लिएका छन् । पाँच उम्मेदवारमध्ये अझै चार उम्मेदवार दुई सचिव पदका लागि प्रतिस्पर्धामा छन् । 

दावी बिरोध परे पनि एनआरएनए यूके उपाध्यक्ष पदका प्रत्यासी सुनिल खड्का र आइसीसी सदस्य प्रत्यासी योगकुमार फगामीको उम्मेदवारी कायमै राखिएको छ । मनोनयन फिर्ताको समयसीमा मंगलबार सकिएपछि निर्वाचन समितिले उम्मेदवारको अन्तिम नामावली सार्वजनिक गरेको छ ।

राष्ट्रिय समन्वय समिति र राज्य समन्वय परिषद गरि कुल ७४ पदमा ११७ जनाले उम्मेदवारी दिएकामा अब ११५ मैदानमा बाँकी रहे । निर्वाचन आगामी १४ सेप्टेम्बरमा तय भएको छ । यसपटक १३ हजार ६२९ मतदाता र उम्मेदवार पनि धेरै भएकाले निर्वाचन रोचक हुने ठानिएको छ ।