तमु त्रिभाषीय वृहत कृति प्रकाशन गर्ने पहल

लन्डन । बेलायतस्थित तमुहरुको ७३ वटा 
संघसंस्थाहरूको संयुक्त प्रयासमा बिगत केहि वर्षदेखि तमुहरुको उत्पत्ति, इतिहास, धर्म, संस्कार संस्कृति, वेशभूषा, भाषासाहित्य, चाडपर्व, सामाजिक, आर्थिक स्थिति र कला सम्बन्धि एउटा त्रिभाषीय वृहत कृति प्रकाशन गर्ने पहल भइरहेको छ । यस अभियानलाई ‘मिलेनियम प्रोजेक्ट’ नामाकरण दिइएको छ । पुस्तकको शिर्षक ‘तमुहरूको सम्पदा’ अथवा ‘गुरुङ हेरिटेज’ राखिएको उक्त बृहत प्रोजेक्टका लेखक मध्येका ‘भेषभूषा र भाषा साहित्य’ का समूह नायक सुमलकुमार गुरुङले बताएका छन् ।

क्या.रि. राजु गुरुङको संयोजनमा सन् २०१२ देखि प्रत्येक वर्ष कार्यशाला गरेर तमु बौद्धिक व्यक्तित्वहरुले आ-आफ्ना धारणा पेश गर्दै आएका छन् । यतिबेला तमु फोरमको निर्देशकको हैसियतमा क्या.रि. राजु गुरुङलाई सर्वसम्मत चयन गरे पश्चात उनको नेतृत्वमा तमु धर्मगुरुहरुको राय बटुल्ने अभिप्रायले यही आउंदो १६ सेप्टेम्बर २०१८ का दिन अन्तरक्रिया 
गर्ने तयारी भएको छ ।

त्यही कार्यक्रम सम्बन्धमा खेगी गुरुहरुसंग शनिबार फार्नबारोस्थित गोर्खा प्यालेस रेस्टुरेन्टमा साधारण सभा सम्पन्न भयो । कार्यक्रमका सह-निर्देशक हरि गुरुङले सञ्चालन गरेको सभाको सभाध्यक्ष क्या.रि. राजु गुरुङले गरेका थिए ।

सभामा फोरमका अर्का सहनिर्देशक क्या.रि. देवराज तमुले स्वागत गर्दै कार्यक्रमको औचित्यबारे प्रकाश पारेका थिए । निर्देशक क्या.रि. राजु गुरुङले यस अभियान सफल पार्न सबैलाई आग्रह गर्दै हालसम्मको प्रगति विवरण संक्षिप्त रुपमा सुनाए । बोर्ड अफ काउन्सिलका अध्यक्ष मेजर रि. एलबी गुरुङ, धर्मगुरुहरु पौडी पच्यु चिबा, यारजंग तमु, खेम्पो शिरलम गुरुङ र क्लिहप्रही चिबा दानबहादुर तमुले आ-आफ्नो धारणा राखे ।

सभाको अन्तमा बोर्ड अफ काउन्सिलका उपाध्यक्ष क्या.रि. डेमबबहादुर तमुले धन्यवाद ज्ञापन गरेर सभा विसर्जन गरेका थिए ।