अल्डरसटमा ८ जुनदेखि नयां ककटेल बार सञ्चालन हुंदै

लन्डन । अल्डरसटमा नेपाली युवाहरुले लगानी गरेको ‘ट्रुथ’ नामक ककटेल बार आगामी जुन ८ देखि सर्वसाधारणका लागि खुल्ला हुने भएको छ । यसअघि मार्च २३ बाट खुल्ला हुने तयारी गरिएपनि यसको विस्तार र अन्य प्रवन्धका कारण ८ जुन देखि खुल्ला हुन लागेको सञ्चालकले जनाएका छन् । ७ जुनमा अतिथी, आफन्तजन र निकट सहयोगीमाझ एक औपचारिक समारोह गर्ने कार्यक्रम रहेको एकजना सञ्चालक दिनेश श्रेष्ठले जनाए ।

तीन युवा उद्यमी दिनेश श्रेष्ठ, दिपेश लामा र सन्दिप पौडेलको साझेदारीमा अल्डरसटको ९३ भिक्टोरिया रोडमा ‘ट्रुथ’ ककटेल बार सञ्चालनमा आउन लागेको हो ।

शुक्रबार र शनिबार डिजेसहित राती २ बजेसम्म बार खुल्ने र अरु दिन राती ११ बजे बन्द हुने सञ्चालकले बताएका छन् । शुरुमा ड्रिंक्समात्र पाइने भएपनि केही समयपछि खाना समेत उपलब्ध हुने बताइएको छ ।

अनुभवी बार टेण्डर भएका कारण ककटेलका लागि आफ्नो बार अल्डरसटमै ‘उत्कृष्ट’ हुने दावी श्रेष्ठको छ ।