एनपीसीसी युकेका महामन्त्रीद्वारा राजिनामा

लण्डन । नेपाली काँग्रेसको युकेस्थित संस्था नेपाली जनसम्पर्क समिति युकेका महामन्त्री विश्व घिमिरेले पदबाट राजिनामा दिएका छन् ।
समितिको तेस्रो अधिवेसनबाट महामन्त्रीमा निर्वाचित घिमिरेले नेतृत्वप्रति असक्षमताको आरोप लगाउँदै पदबाट राजिनामा दिएको एक प्रेस विज्ञप्तिमार्फत बताएका छन् ।

समितिको तेस्रो अधिवेसनका क्रममा सहभागीहरुबाट आएको सुझाव र नेतृत्वलाई दिइएको जिम्मेवारी पूरा गर्न नेतृत्व चुकेको उनले जिकिर गरेका छन् ।
नेतृत्वलाई कार्यसमितिभित्र जिम्मेवारी बाँडफाँड र असन्तुष्टहरुलाई सहमतिमा ल्याई जिम्मेवारी दिलाउन माग गर्दै विगत आठ महिनादेखि बैठक बहिस्कार गर्दै दबाब दिँदा पनि नेतृत्वले अटेर गरेपछि बाध्य भई राजिनामा दिनुपरेको उनले विज्ञप्तिमा उल्लेख गरेका छन् ।
आफनो अडानलाई नेतृत्वले व्यक्तिगत द्वेष र कमजोरीका रुपमा लिएपछि नेता र कार्यकर्ताहरुको सुझावका आधारमा राजिनामा दिएको उनले बताएका छन् ।
उनले नेपाली काँग्रेसलाई एकढिक्का बनाउनुपर्ने आवश्यकतामा जोड दिएका छन् भने राजिनामापछि पनि जनसम्पर्क समितिलाई संस्थागत विकास र सहमतिका लागि स्वतन्त्र ढंगले योगदान दिने बताएका छन् ।
उनी देउवा निकट लोक गुरुङ अध्यक्ष रहेको नेपाली जनसम्पर्क समिति युकेको महामन्त्री थिए । उनको राजिनामापछि पनि जनसम्पर्क समिति युकेमा अझै दुई महामन्त्री छन् ।
बेलायतमा काँग्रेसका दुई समानान्तर समिति रहेका छन् । केही सातायता केन्द्रको दबाबमा एकताका लागि वार्ता समिति बनाएका छन् । यसबेलामा आएको घिमिरेको राजिनामा अर्थपूर्ण रहेको छ ।