समाजसेवा नै जीवन

गुड मर्निङ जोज् । सबेरै डेढ माइल दौडेर मालपास पार्क आइपुग्दा क्षणभरमा उनका अरु हितैषी पनि एकत्रित भइसक्छन् । सप्ताहन्तमा फूर्सदिला देखिएका केटाकेटी टेबुल टेनिस खेल्न तंछाडमछांड छन् । त्यतिबेलासम्म जोज्ले क्याराभानमा थापिएको एउटा सानो पसलबाट कयौंलाई चिया, कफी खुवाइसके । चियाको सुर्कोसंगै ब्रिटिश साथीभाइसंग विहानी कसरतका केही किस्सा सकेपछि एकजना समाजसेवी प्लस् व्यवसायी राजु आचार्य वातचित थाल्छन् टुरोस्थित आफ्नै रेष्टुरेन्ट, नेपाली खाना, अतिथी सत्कार र समाजसेवाको ।

लन्डनबाट दुई सय ८० माइल (पांचसय किमी) टाढा अवस्थित प्रख्यात पर्यटकीय शहर कोर्नवाल टुरोमा चालु काठमाण्डौं प्यालेस् रेष्टुरेन्टका मालिक आचार्यको छिट्टै घुलमिल हुने बानीले आसपास क्षेत्रमा उनी सबैका परिचित छन् । समाजसेवा वा नेपाली खानाको प्रसंग जोडेर उनलाई तारिफ गर्नेको जमात अत्यधिक छ ।

१२ वर्ष जर्मनी बसेर दशकअघि कोर्नवाल आएदेखि आचार्य स्थानीयको सामिप्यतामा सधैं रहिरहे । सन्् २०१२ मा बेलायतको लोकप्रिय अखवार इन्डिपेन्डेन्टले ‘टप ५०’ करिज् हाउस्मध्ये काठमाण्डौं प्यालेस् ‘टप १६’ मा छानेपछि त आचार्यलाई नचिन्ने कमै भए । उस्तो नचल्ने बंगालीको एउटा रेष्टुरेन्ट किनेर उनले चिल्लो, पिरोरहित खाना र न्यानो आतिथ्यता पस्कंदा चांडै नै कर्निस्को मन जितेका हुन् । वेष्ट करी र हस्पिटालिटीका लागि सन् २००८ मा कोर्नवाल सोसियल ग्रुपले गोल्ड अवार्ड प्रदान गरेपछि उनको ‘फेमिली रन’ विजनेशमा ‘सुनमा सुगन्ध’ थपियो ।

उनकै शब्दमा रेष्टुरेन्टमा उपलव्ध एकसय १७ आइटममध्ये मःम, छोयला, एभरेष्ट चिकेन, हिमाली ल्याम्ब, चितवनको तरकारी, झिंगे माछा, भिन्डी, काठमाण्डौं चिकेन चिल्ली आदि कर्निस्को जिब्रोमा गढेको छ । व्यापारिक सफलताको प्रसंग आउंदा उनले स्वादिष्ट खानाका लागि हेड सेफ रविन ज्ञवाली र प्रेरणाको श्रोत धर्मपत्नि सुमित्रालाई भुलेनन् ।

बढ्दो सफलतासंगै साझेदारीमा चारवटा रेष्टुरेन्ट चलाएका छन् उनले । व्यापारमात्र होइन, आचार्यको मन झन् फराकिलो छ । एकथरि विश्लेषण गर्छन्, उनी विना समाजसेवा चल्ला तर समाजसेवाविना आचार्य चल्न सक्दैनन् प्यारालाइसिस विरामी जस्तै ।

चिल्ड्रेन हस्पिस साउथवेष्ट, क्यान्सर रिसर्च यूके, वाटर एड यूके र डिसेवल च्यारिटीलाई नियमित आर्थिक सहयोग गरिरहेका छन् उनले । हेल्प नेपाल नेटवर्कका आजीवन सदस्य उनी त्यो संस्थालाई तीन वर्ष यता वर्षेनी लाख रुपैयां दिन्छन् । बेलायतमा वर्षको ६ पटक च्यारिटी गर्ने आचार्य नेपालीले गर्ने हरेक च्यारिटीमा पुगेर धेरथोर सहयोग गरेकै छन् । ‘हाम्रो कमाइको सानो अंश दुःखी गरिवलाई दिंदा मन सन्तुष्टि हुने भएर समाजसेवा मन पर्छ’, उनले एकसांझ सुनाए । गत वर्ष बेलायतबाट आफ्नै खर्चमा दन्त चिकित्सकको टोली पठाएर आचार्यले चितवनमा निशुल्क दन्त शिविर समेत सञ्चालन गरिदिए । उनले वर्षेनी ब्रिटिश पर्यटकको दुई तीन समूह नेपाल पठाएर पर्यटन प्रवद्र्धन गरिरहेका छन् । चितवन भण्डारा ८ का स्थायी वासिन्दा उनले विशेषगरि चितवनका स्कुल, हेल्थ पोष्ट र एम्बुलेन्स्मा पटक पटक सहयोग गरेका छन् ।

तीन छोरी, एक छोरा र श्रीमतिका साथ बेलायत बस्दै आएका आचार्यले केटाकेटीको शिक्षादीक्षापछि भविष्यमा नेपाल नै फर्किएर समाजसेवामा लाग्ने योजना सांचेका 
छन् । राजनीतिक अस्थिरतासंगै छोराछोरीको सुनौलो भविष्य सांचेर दुई दशकअघि जर्मनी हान्निएका आचार्यलाई प्रवासी जीवन फाप्यो । जेठी छोरीले सानैमा पिएचडी गरिन्, छोराले प्रख्यात मानिने किङ्स कलेजमा टप टेनमा नाम निकाले । माइली 
छोरी डिग्री पढ्दैछिन् भने कान्छी छोरी नर्सिङ ।
‘पहिले घरपरिवार बनाएर अनि समाजसेवा’, कुरा बिट मार्दै उनले भने, ‘इमान्दार र दत्तचित्त भएर लागेमा कुनै पनि क्षेत्रमा सफलता पाइने रहेछ ।’