को हुन् बेलायतमा रहेकी अनिता राना मगर ?

अनिता राना मगरको स्थायी घर तनहुँ भानु नगरपालिकाको रानागाउँ हो । महिला सशक्तिकरण, समाज रुपान्तरण, भाषा संस्कृति संरक्षणमा आवाज उठाउने एक योद्धा हुन् अनिता । लामो समय सम्म मगर संघ युकेमा आबद्ध भएर समुदायको हक अधिकार र मौलिक संस्कृति संरक्षणमा कहिल्यै नथाक्ने उदहरणीय नारी हुन् । रानामगर संस्कृति त्यसमा पनि कौराहा भनेपछि जीवन नै समर्पण गरे । युकेमा कौराहामय बनाउन श्रीमान् कुमार राना मगर, छोरीहरु सम्झना र सविता रानामगरलाई कौराहा अभियानमा जोडिन् । युकेमा अनिताले कार्यक्रम उद्घोषकको भूमिका, श्रीमान् कुमारले कौराहा गित गाउँदै खैजेडीको ताल मिलाउदा दुवै छोरीहरु नाँचेर साथ दिए । तनहुँ माटोले जन्मेकाले होला अनिता रानामगरको सबै परिवारमा कौराहाको विशेष लगाव देखिन्छ ।जसले प्रदेशी भूमि युकेमा हरेक कार्यक्रममा मौलिक कौराहा प्रर्दशन गरेर मगर समुदाय र तनहुँ जिल्लालाई उच्च स्थानमा पुर्‍याउने काम समेत गरेका छन् । तनहुँ समाज युके देखि नेपाली मेला सम्म मौलिक कौराहा प्रर्दशन गरेर संस्कृति संरक्षणमा ठूलो योगदानमा उनै अनितालाई श्रेय जान्छ ।त्यसैले युकेमा अनिता रानालाई कौराहा बहिनीको उपनामले बोलाउन थालिएको हो ।

समुदायको हक अधिकार, संस्कृति संरक्षणमा मात्र सीमित भइनन् उनी । आर्थिक समृद्धिका लागि व्यवसायमा समेत लागेकी एक मगर महिला हुन् । युकेमा परिश्रम गरेर आर्जन गरेको रकम नेपालमा लगानीसमेत गरेकी छिन् । मातृभूमि र संस्कृति प्रेमले उनले नेपालमा लगानी भित्र्याउने मगर महिला हुन् । लाकुरी भञ्ज्याङ रिसोर्ट प्रालिका अध्यक्ष भएर पर्यटन व्यवसायमा अगाडि बढेकी छिन् ।

पत्रकार प्रताप रानाको सहयोगमा