फोनिज यूकेले एकदिने पत्रकारिता गोष्ठी गर्दै

लण्डन । नेपाल आदिवासी जनजाति पत्रकार महासंघ (फोनिज) यूकेले आगामी जनवरी २७ तारिखका दिन मिडिया तथा पत्रकारिता सम्बन्धि एक कार्यशाला गोष्ठी गर्ने भएको छ ।

बेलायतमा रहेका आदिवासी जनजाति समुदायबीच मिडिया र पत्रकारिताका आधारभूत पक्षहरुमा दिक्षित गराउने र आदिवासी जनजाति नेपाली पत्रकारहरुको क्षमता अभिवृद्धि गर्ने उद्देश्य अनुरुप फोनिज यूकेले कार्यशाला गोष्ठी आयोजना गरेको हो ।

अल्डर्शटको भेटघाट रेस्टुरेण्टमा आयोजना गर्न लागिएको उक्त गोष्ठीमा नेपाल पत्रकार महासंघ बेलायतका अध्यक्ष नरेश खपांगी, रेडियो बिजिडब्ल्युएसका निर्देशक सोनाम छिरिङ शेर्पा र नागरिक पत्रकारिताका बिज्ञ डा. नरेशचन्द्र राई प्रमुख प्रशिक्षक रहनेछन् भने बीबीसी नेपाली सेवाका सम्पादक भगीरथ योगीलाई पनि अतिथि प्रशिक्षकको रुपमा निमन्त्रणा गरिएको छ ।

डा. नरेशचन्द्र राई नागरिक पत्रकारिताका बिज्ञ हुन् र उनले रोबर्ट गोर्डन युनिभर्सिटीबाट सिटीजन जर्नालिजममा पीएचडी गरेका छन् ।

फोनिज यूके अध्यक्ष श्रीमती प्रमिला लाबुङ राईका अनुसार कार्यशाला गोष्ठीको प्रकृति मिडिया प्रशिक्षणको जस्तो हुने र गोष्ठीको बिषय ‘आदिवासी जनजाति पत्रकारहरुको क्षमताको अभिवृद्धि’ रहेको छ । तथापि प्रस्तुतकर्ताले आफ्नो बिज्ञताको क्षेत्र र अनुभवको आधारमा पत्रकारिता सम्वन्धि कुनै पनि बिषयमा प्रस्तुती दिन सक्नेछन् । तसर्थ प्रमुख धारका पत्रकारिता गर्दै आएका र मिडिया सम्बन्धि ज्ञान लिन चाहने इच्छुक सबैलाई राईले उपस्थितिको लागि आब्ह्वान गरेकी छन् ।

कार्यक्रम सम्बन्धि बिस्तृत जानकारी फोनिज यूकेको वेवसाइट www.fonijuk.org बाट लिन सकिन्छ ।