अंग्रेजी नयां वर्षमा संसारभर नेपाली टोपी दिवसको रौनकता

पोर्तुगल । रंग रंगका, आ आफ्नो संस्कार र संस्कृति अनुसारका नेपाली टोपी लगाएर आफैंले आफैंलाई एकपटक हेर्नुहोस् त, नेपाली हुनुमा स्वयं गर्व महसुस हुन्छ । सगरमाथा झैं शिर उंचो हुन्छ । टोपी नेपालीहरुको शान, मान र पहिचान हो, यही टोपीको शानलाई विश्वव्यापी परिचित र स्थापित गराउन पांच वर्ष अघि नेपाली टोपी दिवस शुरु भएको हो ।

आज जनवरी १ संसारभरिका नेपालीहरु टोपीमय भएका छन् । पुरै सामाजिक सञ्जाल नेपाली टोपीले भरिभराउ छन् । विभिन्न देशका एनआरएनएहरुको अगुवाइमा औपचारिक रुपमा नै अन्तर्राष्ट्रिय टोपी दिवस मनाइएको विवरणहरु प्राप्त भएका छन् ।

पांच वर्षदेखि इस्बी सम्वतको पहिलो दिन जनवरी १ लाई 
राष्ट्रिय र अन्तर्राष्ट्रियरुपमा नेपाली टोपी दिवसको रुपमा भब्यताकासाथ मनाउंदै आइएको छ । यसवर्ष पनि उत्सवकै रुपमा संसारभर टोपी दिवस भब्य रूपमा मनाइएको र मनाउने क्रम जारी रहेको टोपी दिवसलाई मान्यता दिन सक्रियमध्ये एक युवा आर सी मरहठ्ठाले बताए ।

जनवरी १ लाई नै किन नेपाली टोपी दिवस रोजिएको होला ? टोपी दिवसलाई अन्तर्राष्ट्रियकरण 
गर्दै नेपाल सरकारबाट मान्यता दिलाउनु पर्ने मत राख्ने युरोपस्थित एकजना सक्रिय पत्रकार राजकुमार थापाको तर्क छ, ‘जनवरी १ अन्तर्राष्ट्रिय नयां वर्ष हो, विश्वका अधिकांस देशहरुले यसलाई महाउत्सवका रूपमा मनाउंछन् । संसारभरि बिदा हुन्छ, त्यसैले यही महाउत्सवको दिन नेपाली टोपीलाई अन्तर्राष्ट्रियकरण गर्न यो दिन चुनिनु उचित छ ।’ उनी थप्छन्, ‘नेपालभित्रै त टोपीलाई चिनाउनै पर्दैन नि, टोपीलाई अन्तर्राष्ट्रिय पहिचान दिलाउने हो, संसारमा चिनाउने हो, महाअभियान बनाउने हो, सकारात्मक काममा हातेमलो गर्ने 
हो ।’

जनवरी १ र टोपीको कुनै साइनो नभएको भन्ने खालका विवाद उत्पन्न गर्न खोजिएका सम्वन्धमा एकजना अगुवा रामचन्द्र मरहठ्ठा भन्छन्,’सकारात्मक कामलाई ग्रहण गर्न पनि नसक्ने, जहिले इष्यालु र आलोचनामा दिन बिताउने केही मान्छेले भन्दैमा केही हुंदैन । यो महाअभियान हो, यो स्थापित भइसक्यो, अब यो सबैको साझा पूंजी हो, जोगाएर लानुपर्छ, संसारमा टोपीको पहिचान स्थापित गर्नुपर्छ, मेरो कुरा यत्ति हो, कोहीसंग कुनै विवाद गर्नु छैन् ।’