नेपाल आइडल बिजेताहरुको शो बेलायतमा

लन्डन । गत साता सम्पन्न ‘नेपाल आइडल’ का बिजेताहरुलाई बेलायतका नेपालीले प्रत्यक्ष साक्षात्कार गर्न पाउने भएका छन् ।

बेलायतका विभिन्न शहरमा नोभेम्बर पहिलो सातादेखि हुन गइरहेको ‘नेपाल आइडल लाइभ इन यूके’ कार्यक्रमका लागि पहिलो नेपाल आइडल बुद्ध लामा, फस्ट रनर अप निशान भट्टराई, सेकेन्ड रनर अप प्रताप दास र प्रमिला राई यूके आउन लागेका हुन् ।

मनकामना इन्टरनेशनल लिमिटेड, पोखरा ट्राभल र मुनटाज इन्टरनेशनलले पहिलो कार्यक्रम ३ नोभेम्बरका दिन एम्पायर हल अल्डरसट, ४ नोभेम्बरका दिन फोकस्टनको हकिन्ज कम्युनिटी सेन्टर र ५ नोभेम्बरका दिन हयारो लिजर सेन्टरमा कार्यक्रम गर्ने जनाएका छन् । त्यसैगरि, १२ नोभेम्बरमा प्लमस्टिडको एसियन कम्युनिटी हलमा कार्यक्रम हुंदैछ । कार्यक्रम सञ्चालन गर्न नेपाल आइडलकै होस्ट सुशिल नेपाल बेलायत आउने बताइएको छ ।

आयोजकमध्ये एक सम्सारा ग्रुपका निर्देशक राजाराम गिरीले काठमाण्डौंमा एक पत्रकार सम्मेलन गरि बेलायत कार्यक्रमबारे जानकारी दिए । गिरीले विश्वभर लाखौं शुभचिन्तक बटुलेको चर्चित आइडल कार्यक्रमका विजेतालाई बेलायत ल्याउन पाउनु गर्वको विषय भएको बताए । उनले बेलायतवासी सबैलाई कार्यक्रममा उपस्थित भएर सहयोग गरिदिन अपिल गरेका छन् ।

बेलायतस्थित एकजना आयोजक पोखरा ट्राभलका निर्देशक ज्ञाम गुरुङले अन्य शहरमा पनि कार्यक्रम गर्ने योजना रहेको बताए ।

बेलायतका नेपालीले पनि नेपाल आइडल प्रतियोगितालाई खुबै चासो दिएका थिए । बुद्ध लामालाई आइडल बनाउन एउटा अभियानलाई एकै व्यक्तिले एक लाख रुपैयां बढि चन्दा दिएको घट्नाले सामाजिक सञ्जाल भरिएको थियो ।