नेपालको समृद्धिका लागि चिन्तित बेलायती

लन्डन । नेपालको समृद्धिका लागि तल्लीन बेलायतीहरुको च्यारिटी संस्था ‘सपोर्ट नेपाल यूके’ ले गत आइतबार एक च्यारिटी डिनर कार्यक्रम गरेको छ । लङबरो हल, 
स्टोकनचर्च हाइवेकम्बमा ‘एल्भिस च्यारिटी डिनर नाइट’ भएको हो । स्थानीय बेलायतीको बाहुल्यता रहेको उक्त च्यारिटी कार्यक्रमको संयोजन सहारा यूकेका संस्थापक 
एवं सपोर्ट नेपाल यूकेका संयोजक नवीन गुरुङले गरेका थिए । च्यारिटीबाट करिब ३ हजार पाउण्ड संकलन भएको छ ।

स्याङजाको डांडास्वारामा वेलफेयर सेन्टर निर्माण गर्न आर्थिक सहयोग जुटाउने उद्देश्यले कार्यक्रम गरिएको संयोजक नवीन गुरुङले बताए । बकिङहामसायरवासी बेलायती यस च्यारिटी संस्थामा आवद्ध छन् र अहिले ६ जना ट्रष्टी राखिएको छ ।

बेलायत र नेपाली समुदायबीच अन्तरघुलन गराउने लक्ष्य 
संस्थाले लिएको छ । बेलायती पर्यटकलाई नेपालमा ‘होम स्टे’ र ‘च्यारिटी टुरिस्ट’ प्रोत्साहित गर्ने संस्थाको उद्देश्य छ । संस्थाले सडक वालवालिकाको रेखदेख गरिरहेको सहारा एकेडेमीलाई पनि आर्थिक सहयोग गर्ने बताइएको छ । 
बकिङहामसायरस्थित केही बेलायती विश्वविद्यालयका विद्यार्थीलाई ‘ग्याप इयर’ मा नेपाल लैजाने र नेपालबाट पनि विद्यार्थीलाई बेलायत बोलाएर ‘आइडिया’ आदानप्रदान 
गर्ने योजना बनाइएको संयोजक गुरुङले जनाए ।

उक्त अवसरमा गोर्खा पाइपरको धुन, गायक एल्भिसको जोकसहितको प्रत्यक्ष गायन, राफल ड्र, लिलाम बढाबढ र रोयल ओकबाट उपलब्ध स्वादिष्ट खानामा सहभागी रमाएका देखिन्थे ।

एक्ला डलर अर्बपति विनोद चौधरीद्धारा लिखित आत्मकथाको विमोचन

कार्यक्रममा नेपालका एक्ला डलर अर्बपति विनोद चौधरीद्धारा लिखित आत्मकथाको विमोचन समेत गरियो । सामाजिक अभियन्ताहरु चिरन्जिवी ढकाल, कृष्ण तिमल्सेना, नेपाल पर्यटन बोर्ड यूकेका प्रतिनिधि पशुपति भण्डारी, सहारा यूकेका अध्यक्ष मिनबहादुर गुरुङ साइंला, पूर्व अध्यक्ष दिलिप गुरुङ र संस्थापक अध्यक्ष नवीन गुरुङले चौधरीको कृति ‘मेकिङ इट बीग’ विमोचन गरेका थिए । उद्योगपति चौधरीले पुस्तक विक्रीबाट आएको रकम सहारा यूकेलाई दिने प्रतिवद्धता व्यक्त गरेका छन् ।

उक्त अवसरमा नेपाल पर्यटन बोर्ड यूकेका प्रतिनिधि पशुपति भण्डारीले सहभागी बेलायतीलाई नेपाल पर्यटन सम्वन्धि सामाग्री निशुल्क वितरण गरेका थिए ।