रोहिङ्गा शरणार्थी शिविरमा हैजा फैलिने खतरा

कोक्स बजार, (बङ्गलादेश) ९ असोज (रासस-एएफपी) – विश्व स्वास्थ्य संगठनले बंगलादेशमा शरणार्थीका रुपमा शरण लिई बसेका म्यानमारका रोहिङ्गा सुमदायका नागरिक रहेको शरणार्थी शिविरमा हैजाको उच्च जोखिम रहेको बताएको छ ।

म्यानमारबाट भागेर बंगलादेशमा आइ बसेका चार लाखभन्दा बढी शरणार्थी बसेको सो शिविरमा हैजाको उच्च जोखिम रहेको अनुमान सो संगठनले गरेको छ ।

म्यानमार र बंगलादेशको सीमा क्षेत्र नजिकै चार लाख ३६ हजार शरणार्थीले शरण लिएर बसेका छन् । उनीहरुले उक्त क्षेत्रमा बडो कष्टपूर्ण जीवनयापन गरिरहेका बताइएको छ ।

उनीहरुलाई विभिन्न ६८ वटा शिविर बनाएर राखिएको छ । तर आधारभूत आवश्यकताजस्तै खाने पानी, पौष्टिक आहार या सफा बस्ने स्थान, औषधोपचारको पनि उनीहरुलाई कमी छ ।

यसै कारणले उक्त शिविरमा हैजाको उच्च जोखिम रहेको चेतावनी विश्व स्वास्थ्य संगठनले दिएको छ । उनीहरु सो क्षेत्रमा बसेको एक महिनाभन्दा बढी भएको छ ।

अहिले नै उनीहरुमा सफा खानेपानीको अभाव रहेको र सरसफाइका लागि पनि राम्रो ध्यान नदिइएकाले पानीजन्य रोगको प्रकोप देखिएको छ ।

यसमाथि निगरानी राख्ने र आवश्यक उपचारको प्रबन्ध तथा अन्य व्यवस्था नगर्ने हो भने उनीहरुमा हैजाकै प्रकोप शुरु हुनसक्ने खतरा रहेको उक्त संगठनले जनाएको छ ।

ती शिविरलाई लक्ष्य गरी घुम्ती स्वास्थ्य शिविर राखिएका छन् भने बंगलादेशले पनि यसको व्यवस्था गरेको छ । तर पनि उनीहरुमा यो समस्या भने बाँकी नै छ ।

रोहिङ्गाको कष्टपूर्ण दैनिकी 

बंगलादेशको सीमा क्षेत्रमा रहेको नाफ नदी तरेर उनीहरु बंगलादेशसम्म पुगेका छन् । उनीहरु यसरी जोखिमपूर्ण रुपमा नदी पार गर्ने क्रममा ज्यान पनि जाने गरेको छ ।

गएको अगष्ट २५ देखि रोहिङ्गाको बहुल्यता रहेको म्यानमारको बस्ती राखिनबाट उनीहरु भागेर त्यहाँ पुगेका हुन् । त्यस समयदेखि आजसम्ममा ती समुदायका कम्तीमा पनि १०० जनाको ज्यान गएको अधिकारीले जनाएका छन् ।

यसरी भागेर नदी तर्ने क्रममा कतिपय सो नदीले बगाएकोले शव पनि भेटिएको छैन । उनीहरुले आआफ्नो घर बस्तमा आगो लगाएर सेनाले लखेटेको बताएका छन् ।

तर पनि म्यानमार सरकारले भने उनीहरूमाथि त्यस्तो कुनै हिंसा नभएको दाबी गर्दै आएको छ । सरकारले सेनाले नै जनता लखेटेको भन्ने समाचारमा कुनै सत्यता नरहेको बताएको छ ।

उनीहरु आन्तरिक रुपमा विस्थापित भएका स्थानमा पनि खाद्य पदार्थ, पानी, आवास र औषधोपचारसमेत उपलब्ध नरहेको पाइएको छ । उनीहरुको अवस्था देशभित्र तथा बंगलादेशमा समेत दयनीय रहेको समाचार आइरहेका छन् ।

अहिलेसम्म यहाँबाट भागेर बंगलादेशसम्म पुग्ने नागरिकको संख्या चार लाख ३६ हजार पुगेको छ । उनीहरुलाई बंगलादेशमा खान र बस्नका लागि आधारभूत आवश्यकताको अत्यन्तै कमी भएको भन्दै सहायता समूहसँग बंगलादेशले विश्व समुदायलाई आग्रह गरिरहेको छ ।

विस्थापित बालबालिका झनै बढ्ने 

यस वर्षको अन्त्यसम्ममा छ लाखभन्दा बढी बालबालिका म्यानमारबाट विस्थापित भएर बंगलादेश प्रवेश गर्ने अनुमान गरिएको छ ।

रोहिङ्गा समुदायका बालबालिका म्यानमारको राखिन राज्यमा भएको हिंसाका कारण विस्थापित भइरहेका छन् । उनीहरु यस वर्षको अन्त्यसम्ममा त्यति ठूलो संख्यामा बाहिरिनुपर्ने अवस्था आएको सहायता समूहले जनाएको छ ।

संयुक्त राष्ट्रसंघका अनुसार अहिले विस्थापित भएकामध्ये झण्डै आधा जति बालबालिका मात्र रहेका छन् । उनीहरुको संख्या अझै बढ्न सक्ने बताइएको हो ।

यस वर्षको अन्त्यसम्ममा विस्थापितको संख्या बढेर छ लाख पुग्नेछ– सेभ द चिल्ड्रेन च्यारिटीका बंगलादेश प्रमुख मार्क पिर्सले भन्नुभयो ।

बंगलादेश र सहयोगी निकायले विस्थापितका लागि कोक्स बजारको नजिकै खुल्ला तथा पहाडी ठाउँमा शिविरको व्यवस्थापन गर्न लागिरहेका छन् । कोक्स बजार म्यानमारसँग सिमाना जोडिएको बंगलादेशको ठाउँ हो ।