एनआरएनए पोर्तुगलको सदस्य संख्या २३४८, नेतृत्वको लागि खिचडी पाक्दै

लिस्बोन । युरोपमा बेलायतपछि सबैभन्दा बढी नेपाली रहेको पोर्तुगलमा एनआरएनएको चुनावी सरगर्मी बढेको छ । बुधबार अपरान्ह ५ बजे अन्तिम मतदाता नामावली प्रकाशन भएसंगै चुनावी चर्चा चुलिएको हो । केही छुट, केही सच्याउने मिलाउने गरेर २३४८ अन्तिम मतादाता संख्या कायम भएको निर्वाचन समितिका राजकुमार थापाले जानकारी गराए । सेप्टेम्बर १ तारिख बिहान १० बजेदेखि २ तारिख दिउँसो ४ बजेसम्म उम्मेदवार मनोनयनको कार्यक्रम राखिएको छ । अधिबेशन सेप्टेम्बर १० मा हुँदैछ ।

नेतृत्वको लागि खिचडी पाक्दै

अगस्ट २८ मा बसेको जनसम्पर्क समिति पोर्तुगल अर्थात कांग्रेसजनहरुको एउटा भेलाले एनआरएनए पोर्तुगलको नेतृत्वको लागि आफ्नो तर्फ समझदारी भएको दावी गरेका छन् । समझदारी अनुसार एनआरएनए पोर्तुगलको अध्यक्षका लागि सुनिल संगम, आइसीसी सदस्यका लागि कुबेर कार्की र एक उपाध्यक्षका लागि कमल गुरुङको नाम तय गरिएको बुझिएको छ । तर समझदारी भङ्ग हुने सम्भावना पनि उत्तिकै छ, किनकी आइसीसी सदस्यमा प्रस्ताव गरिएको कुबेर कार्की असन्तुष्ट रहेको र अध्यक्षमै दावी गरिरको बुझिएको छ ।

यता प्रवासी नेपाली मंचले पनि आइसीसी सदस्य, अध्यक्ष, महासचिव मै दावी गर्ने अध्यक्ष गोविन्द पौडेलले बताए । अर्को एक आइसीसी सदस्यमा गोबिन्द पौडेल, रोबर्ट लिम्बु, शम्भु गौतम, धनराज शेर्पा र पेम्बा शेर्पा मध्ये एक हुने सम्भावना छ । अन्य उपाध्यक्षमा निमलमु शेर्पा, बलराम पौडेल र महिला उपाध्यक्षमा नारी समाज पोर्तुगलकी अध्यक्ष सीता बराल र महासचिवमा निराजन सुबेदी र यदि पेम्बा शेर्पा आइसीसी सदस्य नभए पेम्बागेलु शेर्पा उठ्ने सम्भावना रहेको बताइएको छ ।

महासचिवमा पत्रकार गणेश पान्डेयको सशक्त दावीले निर्वाचन रोचक र प्रतिस्पर्धात्मक हुने देखिएको छ । कोषाध्यक्षमा जितु कार्की र कुमार तामाङले दावी गरेको बुझिएको छ ।

पत्रकारको नाम समावेश

लिस्बोनमा कार्यरत एकजना नेपाली पत्रकार गणेश पान्डेयको नाम प्रारम्भिक मतदाता नामावलीमा प्रकाशित नभए पछि सामाजिक संजालमा हल्लीखल्ली भएको थियो तर अन्तिम नामावलीमा भने समावेश भएको छ । ‘ईमेलमा केही प्राबिधिक कारणले छुटेको हो, सबै प्रक्रिया पुगेको हुनाले अन्तिम नामावली समावेश भइ प्रकाशित भइसक्यो’, निर्वाचन समितिका राजकुमार थापाले भने ।