राप्ती समाज यूकेको दशौं वार्षिकोत्सव

लन्डन । बेलायतमा बसोबास गर्ने राप्तीवासीहरुको संस्था राप्ती समाज यूकेको वार्षिक भेला गत २९ जुलाईमा लन्डन नजिकै क्याम्बर्लीमा भव्य रुपमा सम्पन्न भएको छ ।

कार्यक्रमको शुरुमा संस्थाका सहसचिव धन रोकाले स्वास्थ्य एवम् सुरक्षा सम्बन्धी जानकारी दिएका थिए । राप्ती समाज यूकेको दश वर्ष पुरा भएको अवसरमा आयोजित सो कार्यक्रमको प्रमुख अतिथि गोपाल थापा तथा समाजका अध्यक्ष हिक्मत सिं रोकाले पानसमा बत्ती बालेर कार्यक्रमको औपचारिक उद्घाटन गरे ।

स्वागत मन्तव्य दिंदै समाजका उपाध्यक्ष केशर रोकाले समाजले प्रवासमा बसेर पनि आफ्नो भाषा, संस्कृति जोगाउनुका साथै नेपालमा राप्तीवासीको सुःख दुःखमा साथ दिंदै आएको बताए ।

निर्वाचन समितिका अध्यक्ष घमानसिं घर्तीमगरले नयाँ कार्यसमितिको घोषणा गर्नुकासाथै पदाधिकारी तथा सदस्यहरुको सफल कार्यकालका लागि शुभकामना दिए ।

संस्थाको दश वर्षे इतिहासको समीक्षा गर्दै समाजका संस्थापक अध्यक्ष टिकासिं ठकुरीले समाजले अहिलेसम्म गरेका काम कारवाही र भविष्यको बारेमा संक्षेपमा प्रकाश पारेका थिए । सो कार्यक्रममा शैक्षिक क्षेत्रमा राम्रो गर्ने बालबालिकाहरुलाई प्रशंसापत्र वितरण गरिएको थियो ।

सांगीतिक कार्यक्रमको सन्चालन समाजकी सांस्कृितक सदस्य करिश्मा घर्ती र लक्ष्मी घर्ती मगरले गरेका थिए । कार्यक्रममा नेपालबाट आएकी कलाकार जानकी तारमी मगरले सांगीतिक प्रस्तुति दिएकी थिइन् । त्यसैगरी बेलायतस्थित कलाकार विश्वदीप मगरले पनि भरपुर मनोरन्जन गराए ।

सो अवसरमा समाजका अध्यक्ष हिक्मतसिं रोकाले आफूहरु केही लिन भन्दा समाजलाई केही दिन भनेर आएको बताउँदै समाज सबै राप्तीवासीको साझा मन्च भएको उल्लेख गरे ।
करिब ४०० जनाको सहभागिता भएको सो कार्यक्रमको सन्चालन समाजका सचिव दिनेश खड्काले गरेका थिए ।