युवा उद्यमी बीरेन्द्र श्रेष्ठको एनआरएनए यूके युवा संयोजकमा दावेदारी

लन्डन । बेलायतस्थित सफल युवा व्यवसायी बीरेन्द्र श्रेष्ठले एनआरएनए यूकेको आसन्न निर्वाचनमा युवा संयोजकको उम्मेदवारी दिने भएका छन् । पछिल्लो पटक मिडियाकर्मीका रुपमा उदयीमान श्रेष्ठले सेप्टेम्बर ९ को निर्वाचनमा उक्त पदको दावी गरेका हुन् ।

पेसाले इलेक्ट्रोनिक इन्जिनियर श्रेष्ठ बेलायतमा छोटो समयमा नै ब्यवसायिक रुपमा सफल भएका छन् । रामेछाप स्थायी घर भइ दशकयता बेलायत बस्दै आएका श्रेष्ठले मोबाइलको सफ्टवेयर तथा रिपेयरिंग होलसेल ब्यवसाय सञ्चालन गरेका छन् । उनीसंग विश्वव्यापी रुपमा ग्लोबल मोबाइल सफ्टवेयर र अनलकिंगको दक्षता समेत छ ।
पछिल्लो समय नेपाली टिभी यूके, सांग्रीला टिभी र एक्सप्रेस स्टुडियोमा सक्रिय श्रेष्ठ फोटोग्राफी र भिडियोग्राफीमा समेत दख्खल राख्छन् । लन्डन साउथ ह्यारोमा सहकर्मी दिनेश परियार र जगन कार्कीसंग मिलेर उनले एक्सप्रेस स्टुडियो सञ्चालन गरेका हुन् । उनको ‘इभेन्ट्स एण्ड मोर’ कार्यक्रम र अन्तर्वार्ता बेलायती समुदायको रोजाइमा छ।

सामाजिक काममा समेत सक्रिय श्रेष्ठले आफ्नो गाउं रामेछापमा मात्र होइन, विपत्तिका बेला देशमा पटक-पटक आर्थिक सहयोग गरेका छन् ।

विशेषगरि मोबाइल रिपेरिंग तालिम दिएर युवाहरुलाई स्वावलम्बी बनाउन उनको महत्वपूर्ण योगदान छ । उनले स्वदेश तथा विदेशमा रहेका युवाहरुलाई रोजगारी तथा व्यापारको अवसर समेत प्रदान गरेका छन् । बेलायतमा रहेका कयौं नेपाली संघ संस्थामा प्रत्यक्ष अप्रत्यक्ष रुपमा संलग्न श्रेष्ठ मिलनसार, हंसिलो र सहृदयी भावनाका छन् ।

आफूले सिकेको सिप, ज्ञान र अनुभवको उच्चतम प्रयोग गरी बेलायतमा रहेका युवाहरुलाई उद्यमशीलतातर्फ अग्रसर गराउन उनको भूमिका गहन छ । युवाहरुका प्रेरक व्यक्तित्व श्रेष्ठले एनआरएनए यूकेमा रहेर केही परिवर्तनको आभाष र युवाहरुलाई संघको अपनत्व दिलाउने अठोट लिएका छन् ।

श्रेष्ठले अघि सारेका एजेन्डाहरु निम्न छन्ः

१) बेलायतस्थित युवाहरुमा उद्यमशीलता र सृजनशीलता विकासका लागि तालिम तथा गोष्ठी सञ्चालन गर्ने ।
२ ) युवाहरुको जोश जाँगर, उपयोगिता साथै आत्मविश्वास बढाउन प्रचारात्मक भन्दा रचनात्मक काम गर्ने ।
३) युवा उद्यमशीलताका लागि वित्तिय सहयोग गर्न ‘सिड फन्डिंग’ मा पहल गर्ने ।
४) बेलायतमा नयाँ पुस्ता र पुरानो पुस्ताबीचको दुरी कम गर्न युवाहरुकै अग्रसरतामा विविध सामाजिक काम सञ्चालन गरेर पुस्तान्तर कम गर्ने ।
५) खेलकुद मार्फत शारीरिक, शैक्षिक तथा चेतनामुलक कामहरु मार्फत बौद्धिक क्षमता अभिवृद्धिका लागि निरन्तर पहल गर्ने ।
६) विद्यार्थीहरुलाई स-सम्मान उनीहरुको सिप, ज्ञान र अनुभव प्रयोग गर्न स्वयंसेवा कार्यक्रम मार्फत उपयुक्त अवसर प्रदान गर्ने।
७) एनआरएनलाई युवा मैत्री बनाउन पहल गर्ने ।
८) भूपू गोर्खाहरुको जारी आन्दोलन सफल बनाउन युवा पुस्तालाई नेतृत्वदायी भूमिकाका लागि पहल गर्ने ।
९) बेलायतस्थित युवाहरुमा बढ्दै गएको सांस्कृतिक क्षयीकरण न्यून गर्न विशेष कार्यक्रम ल्याउने ।
१०) बेलायत र नेपालका उद्यमी युवाबीच समन्वय गरि युवा उद्यमीहरुलाई प्रोत्साहन गर्न संयोजनकारी भूमिका निर्वाह गर्ने ।