७२ लाख घुससहित विमानस्थल भन्सारका दुई नासु पक्राउ

काठमाडौं। अख्तियार दुरुपयोग अनुसन्धान आयोगले सुन तस्करीलाई छुटाउन ७२ लाख घुस लिने त्रिभुवन अन्तर्राष्ट्रिय विमानस्थल भन्सार कार्यालयका दुई नायब सुब्बासहित ५ जनालाई पक्राउ गरेको छ। उनीहरुको साथबाट ७२ लाख रुपैया बरामद भएको छ। अख्तियारको टोलीले भन्सार कार्यालयका नासु सुरेश थपलियालाई ५१ लाख रुपैयासहित शनिबार पक्राउ गरेको छ। यसअघि घुसको पैसासहित नासु हरिवंश कार्कीलाई शुक्रबार साँझ धुम्बाराहीबाट पक्राउ गरेको थियो।

अख्तियार टोलीले कार्कीसँगै भन्सार एजेन्ट प्रेम अधिकारी र देवराज भट्टराईसहित धुम्बाराहीस्थित मुनलाइट पार्टी प्यालेसबाट पक्राउ गरेको थियो। सोही टोलीले कार्कीको आकासेधारास्थित घरमा छापा मारेको थियो र कार्कीको पत्नि लक्ष्मी लम्साललाई पक्राउ गरेको थियो। लम्सालले दिएको बयानका आधारमा शनिबार थपलिया पक्राउ परेका हुन्।

सुन तस्करीमा पक्राउ परेका भारतीय नागरिक अभिषेक सरकारलाई छुटाउन शुरुमा एक करोड मागे पछि ७२ लाख रुपैयामा सरकारलाई छाड्न सहमत भएका थिए। अख्तियारले उनीहरुबाट घुस लिएको ७२ लाख रुपैया नै बरामद गरेको छ।