नर्सहरुले लन्डनमा खेले देउसी भैलो

लन्डन । बेलायतमा कार्यरत नेपाली नर्सहरुले लक्ष्मी पूजाको रात लन्डनका विभिन्न ठाउंमा देउसी भैलो खेलेका छन् । नेपलिज नर्सिङ एसोसिएसन यूके आवद्ध नर्सहरुले नेपालमा वर्थिङ सेन्टर स्थापनाका लागि आर्थिक सहयोग जुटाउन देउसी भैलो खेलेका हुन् ।

एसोसिएसनकी सदस्य गायत्री श्रेष्ठको संयोजनमा साउथ इष्ट लन्डनको चाल्टर्नमा कार्यक्रम भएको थियो । उक्त समूहमा एसोसिएसनकी अध्यक्ष सुशिला कार्की, सुमित्रा पुन, रेखा सिटौला, भवानी पाण्डे, रश्मी बास्तोला, धनमाया महर्जन, सुनिता गौतम लगायत सहभागी थिए ।

उता, महासचिव विनोद विकास सिम्खडाको संयोजनमा वेष्ट लन्डनमा पनि देउसी भैलो कार्यक्रम भएको अध्यक्ष कार्कीले जनाइन् । वेष्ट लन्डन समूहमा भने मनमाया सुनुवार, बासु लामिछाने, रश्मिता धर्माली, रचना कार्की, सुनिता अर्याल, सुदर्शना शाक्य आदि सहभागी भए ।

एसोसिएसनले शनिवार पनि खेल्ने योजना बनाएको छ ।

देउसी भैलो कार्यक्रमका सहभागीले नेपालको झल्को दिने गरि भट्याए, नाच गान गरे । अध्यक्ष कार्कीले शनिवारसम्म रकम संकलन जारी रहने जनाएकी छिन् ।